(၁)
တစ်နေ့က ပုံမှန်လာရောက်ပြီး တရားအားထုတ်၊ တရားနာလေ့ရှိတဲ့ အိန္ဒိယနွယ်ဖွား ဒကာမကြီးနဲ့ တရားထိုင်နေစဉ် နာရီပြည့်ခါနီးမှာ နောက်က လူတစ်ယောက်ဝင်လာသံ၊ ဖိနပ်ချွတ်သံ ကြားလိုက်ရတယ်။ သူစိမ်းလား၊ ဘယ်သူလဲ ဘယ်ဝါလဲဟု စိတ်က တွေးဖြစ်သွားတယ်။ တရားအာရုံလွတ်သွားတယ်။ ခဏနေတော့ ငြိမ်သွားတယ်။ သိလိုစိတ်က ပိုပြင်းပြလာတယ်။ ပြီးတော့ အသက်ကို မှန်မှန်ရှူရှိုက်သံ ကြားလာရတယ်။ အော် သူလည်း တရားလာထိုင်တာ ဖြစ်မှာပါလို့ တွေးလိုက်တယ်။ အဲဒီအခါမှ တရားကို ပြန်အာရုံပြုဖြစ်တယ်။
(၂)
၁ဝ မိနစ်လောက်အကြာမှာတော့ နာရီအချက်ပေးသံနဲ့အတူ တရားဖြုတ်လိုက်တယ်။ တရားဖြုတ်ပြီးတာနဲ့ နောက်ကို လှည့်ကြည့်လိုက်တယ်။ ဖိနပ်စင်လေးဘေးမှာ လူတစ်ယောက်တရားမှတ်နေလေရဲ့။ ကိုယ့်လည်း မြင်ရော သွားမယ်ဆိုပြီး လက်ကာပြတယ်။ နေပါအုံး၊ နေပါအုံး မိတ်ဆက်ပါအုံး၊ ဒီနား လာထိုင်ပါအုံးဆိုတော့ အိန္ဒိယဒကာမကြီးက မခေါ်နဲ့ ဘန္တေ တဲ့။ အော် ခေါ်ရမှာပေါ့၊ တရားလာအားထုတ်တဲ့သူကိုလို့ ဆိုတော့ အနားကို တိုးတိုးလေး ကပ်ပြောတယ်။ အရက်သမား၊ ဆေးသမားကြီးနဲ့တူတယ်တဲ့။ သူ ဘာပဲဖြစ်နေနေ၊ ဦးဇင်းကတော့ သူနဲ့ စကားပြောကြည့်ချင်တယ်လို့ ပြောလိုက်တယ်။ သူ့ကို တရားထိုင်တဲ့ ဆိုဖာလေး ယူခိုင်းပြီး ထိုင်ခိုင်းလိုက်တယ်။
(၃)
သူက အသက် ၅ဝ ကျော်ပြီတဲ့။ ဆေးစွဲနေပါတယ်။ မိန်းမတွေ၊ သားသမီးတွေနဲ့လည်း ဝေးသွားပါပြီတဲ့။ ပြောရင်းနဲ့ မျက်ရည်တွေ ကျလာတယ်။ သူ့လက်ကောက်ဝတ်နဲ့ မျက်ရည်တွေ သုတ်နေတယ်။ မိမိက တစ်ရှူးတစ်ခုလှမ်းပေးလိုက်တယ်။ သူ ဆေးဖြတ်ချင်တယ်။ ဘယ်လိုမှ ဖြတ်မရဘူး ဖြစ်နေတယ်။ မင်း ဖြတ်ပေးနိုင်မလားတဲ့ သူက မေးတယ်။ ငါတော့ ဖြတ်မပေးနိုင်ဘူး။ ဟောမှာ တွေ့လား၊ ထိုင်နေတဲ့သူ ဗုဒ္ဓလို့ ခေါ်တယ်။ သူ ဖြတ်ပေးနိုင်တယ်လို့ ပြောလိုက်တယ်။ အနည်းငယ် စိတ်ဝင်စားသွားသလား မသိဘူး။ ဘုရားဆင်းတုကို အသေအချာကြည့်နေတယ်။ အိုး တကယ်လား၊ သူက ဖြတ်ပေးနိုင်တယ်လို့ မယုံသင်္ကာမျက်လုံးနဲ့ ပြောနေတယ်။
မင်းကသာ သူပြောတဲ့အတိုင်း လုပ်ရင် သူ ဖြတ်ပေးနိုင်တယ်လို့ ပြောလိုက်တယ်။ သူက ရယ်စရာပြောတယ်လို့ ထင်နေပုံရတယ်။ သူက စကားမှ မပြောတတ်တာတဲ့။ ဟောဒီမှာ ကြည့်၊ (ပဋ္ဌာန်းအကျယ်စာအုပ်ထူကြီးကို ကိုင်လျက်) ဒါ သူပြောခဲ့တဲ့ စကားတွေပဲ၊ ဒါမျိုးစာအုပ်က ၄၂ အုပ်တောင် ရှိတယ်လို့၊ အဲဒီလောက်တောင် ပြောခဲ့တာလို့၊ အဲဒီစကားတွေကို ငါက မင်းကို ပြန်ပြောမှာလို့ ပြောလိုက်တယ်။
သူက စကားတွေ အများကြီး လျှောက်ပြောနေတော့ (ရစ်နေတော့) စကားအများကြီး မပြောပါနဲ့။ သူက(ဗုဒ္ဓက) စကားအများကြီး ပြောတာ မကြိုက်ဘူး၊ အလုပ်အများကြီး လုပ်တာပဲ ကြိုက်တယ်လို့ ပြောတော့ သူက ဘာလုပ်ရမှာလဲလို့ မေးတယ်။
ေ
ဆေးသမားတော့ နည်းနည်းများ ငြိမ်မလားဆိုတဲ့အတွေးနဲ့ ကဲ တင်ပလ္လင်ခွေ ထိုင်ပါ၊ ဘယ်လက်ဖဝါးပေါ် ညာလက်ဖဝါးကို တင်ပါ၊ ခါးကို မတ်မတ်ထားပါ၊ မျက်စိကို မှိတ်ထားပါ၊ စိတ်ကို လျှော့ချလိုက်ပါ၊ ခေါင်း ဆံစကနေ ခြေဖျားအထိ ဖြည်းဖြည်းချင်း အာရုံပြုကြည့်ပါ၊ အကြောတွေအားလုံးကို လျှော့ချထားပါ၊ စိတ်ထဲကနေ တစ်ကိုယ်လုံးကို ကြည့်လိုက်ပါ၊ ဘယ်နေရာက တင်းနေသေးလဲ၊ တစ်ကိုယ်လုံး သက်တောင့်သက်သာအနေအထားဖြစ်တဲ့အထိ လျှော့ချပါ၊ ကျေနပ်ပြီဆိုတာနဲ့ မင်း မျက်လုံးတွေကို ခဏဖွင့်ပြီး ငါ လုပ်တာကို ကြည့်ပေးပါ။
သူ့ရှေ့မှာ အသေအချာထိုင်ပြတယ်။ မင်းရဲ့ ဝင်သက်ထွက်သက်ကို မှတ်မယ်။ သတိပြုမယ်။ ထွက်လေထွက်တဲ့အခါ လေလေးက ဒီနေရာကို ထိသွားတယ်။ နှာသီးဖျားကို လက်ထောက်ပြီး ပြတယ်။ ဝင်လေဝင်သွားတဲ့အခါလည်းပဲ လေက ဒီနေရာကို ထိသွားတယ်။ မင်း ဘာမှ လုပ်စရာ မလိုဘူး။ မင်း လုပ်ရမှာက အဲဒီ လေထိသွားတာလေးကို သတိပြုနေဖို့ပဲ။ ဒီနေ့ အစဆုံးနေ့ဆိုတော့ မိနစ် ၃ဝ နဲ့ စမယ်။ မင်း အတတ်နိုင်ဆုံး လုံးဝ မလှုပ်ပါနဲ့။ လှုပ်ချင်တယ်ဆိုရင် သတိလေးထားပြီး ဖြည်းဖြည်းချင်းလေး လှုပ်ပါ …. စသဖြင့် တရားထိုင်နည်းအကျဉ်း ပြောပြလိုက်တယ်။ နာရီအချက်ပေးစက်ကို မိနစ် ၃ဝ ပေးပြီး တရားစထိုင်လိုက်တယ်။
(၄)
မိနစ် ၃ဝ ပြည့်သွားတယ်။ အိန္ဒိယဒကာမကြီးကော မိမိပါ အံ့သြသွားတယ်။ သူက မိနစ် ၃ဝ ပြည့်တဲ့အထိ တရားထိုင်နိုင်ခဲ့တာကိုပေါ့။ ပြီးတော့ အခြေအနေ ဘယ်လို ရှိလဲလို့ မေးတော့ ကောင်းတယ်တဲ့။ ဆေးသုံးထားတဲ့အချိန်တွေ လာလို့ ရလားတဲ့။ အချိန်မရွေးလာခဲ့ပါ။ လာရင်တော့ တရားထိုင်ရမယ်လို့။ သူက ဘာကြောင့်ရယ် မသိ၊ ဆေးကြောင့်လော၊ ဘာကြောင့်လဲတော့ မသိ၊ မျက်ရည်တွေ ထပ်ကျလာနေတယ်။ နောက်လည်း လာပါဦးမယ်တဲ့။ သူ့စိတ်တွေ နည်းနည်းငြိမ်းချမ်းပါတယ်တဲ့။ ငါ ဆေးပြတ်ဖို့ ငါ့ကို စကားလက်ဆောင်နည်းနည်း ပြောပေးနိုင်မလားလို့ မေးပါတယ်။
အမှန်တော့ သူ့ကို စကားအကြာကြီး မပြောချင်ပါ။ သို့သော် မတော်တဆများ ဆေးဖြတ်နိုင်သွားရင်ဆိုတဲ့အတွေးလေးနဲ့ ထိုင်းမှာ ရဟန္တာလို့ နာမည်ကြီးတဲ့ ဆရာတော်အာဂျန်ချားစာအုပ်ထဲက ဥပမာလေးနဲ့ စကားနည်းနည်း ပြောဖြစ်ခဲ့တယ်။
(၅)
သတ္တဝါလေးတွေဟာ ထောင်ချောက်မိတယ်ဆိုရင် အသည်းအသန် ရုန်းကန်အော်ဟစ်ရင်း ဆင်းရဲခံစားရတယ်။ သူတို့ဟာ လွတ်မြောက်ဖို့အတွက် အားကုန်ထည့်ပြီး ရုန်းကြတယ်။ ဒါပေမဲ့ ရုန်းလေလေ ထောင်ချောက်က ပိုတင်းပြီး ဝေဒနာက ပိုခံစားရလေလေပဲ။
မင်း ဆေးစွဲတယ်ဆိုတာလည်း ထောက်ချောက်မိခြင်းတစ်မျိုးပဲ။ မင်း ဘယ်လောက်ပဲ ရုန်းရုန်း ထွက်လို့ကို မရဘူး။ ထောင်ချောက်မိနေတဲ့ သတ္တဝါလေးတွေ လုပ်နိုင်တာတစ်ခုပဲ ရှိတယ်။ အဲဒါကတော့ မုဆိုးလာတာကို စောင့်ပြီး အသေခံဖို့ပဲ။ ငှက်ကလေးတွေ ကြိုးကွင်းထောင်ချောက်မိတာလည်း အတူတူပဲ။ လည်ပင်းကို ကြိုးကွင်းက စွပ်မိနေတော့ ဘယ်လိုပင် ရှေ့တိုးနောက်ငင် ရုန်းရုန်း၊ ပိုပြီးတော့ အထိနာရုံပဲ။
ငါတို့မှာလည်း ထောင်ချောက်တွေ ရှိတယ်။ အမြင်အာရုံထောင်ချောက်၊ အကြားအာရုံထောင်ချောက်၊ အနံ့အာရုံထောင်ချောက်၊ အရသာအာရုံထောင်ချောက်၊ အတွေ့အာရုံထောင်ချောက်တွေ။ မင်း ဆေးစွဲတယ်ဆိုတာ အရသာအာရုံထောင်ချောက်ပဲ။ ဆေးချလိုက်ရင်ဖြစ်တဲ့ အရသာကနေ အခြားအာရုံထောင်ချောက်တွေထဲကို မင်း ဆက်တိုးမှာပဲ။
မုဆိုးထောင်ထားတဲ့ ထောင်ချောက်တွေကတော့ လုံးဝကို လွတ်လမ်းမရှိဘူး။ ဒါပေမဲ့ ကံကောင်းတာက အမြင်၊ အကြား၊ အနံ့၊ အရသာ၊ အတွေ့ဆိုတဲ့ ထောင်ချောက်တွေကနေ လွတ်ဖို့အတွက်ကတော့ ဟောဒီက ဗုဒ္ဓက နည်းပေးထားတယ်။ အဲဒါ စောစောက မင်း ကြိုးစားလိုက်တဲ့ တရားအားထုတ်တာပဲ။
နောက်ဆင်တူတဲ့ ဥပမာလေးတစ်ခု ပြောပြမယ်။ တံငါသည်တစ်ယောက်ဟာ ငါးမျှားချိတ်ကို ရေထဲ ချထားတယ်။ ငါးက အစာကို မက်မောပြီး လာဟပ်တယ်။ သူ့လျှာ(အာခံတွင်း)မှာ ငါးမျှားချိတ်က လာချိတ်မိတယ်။ သူ ဘယ်လိုပဲရုန်းရုန်း မလွတ်နိုင်ဘူး။ အာခံတွင်းက
နာကျင်မှုကလည်း ပြင်းထန်တဲ့ဝေဒနာတွေ ပေးနေတယ်။ သွေးစတွေတောင် ပေကျံလို့။ သူက အနာခံပြီး ရုန်းလိုက်ရင် သူ့လျှာ သို့မဟုတ် ခံတွင်းက စုတ်ပြဲသွားနိုင်တယ်။ ဒါပေမဲ့ သူ လွတ်မြောက်သွားနိုင်တယ်။ အဲဒီလိုပဲ မင်းဟာ ဆေးကို စွဲမိသွားပြီ။ ငါးမျှားချိတ်က ငါးခံတွင်းထဲ ရောက်နေသလိုပဲ။ မင်း ဘယ်လိုမှ ထုတ်လို့ မရဘူး။ ဒါပေမဲ့ မင်း ပေတေပြီး တရားအားထုတ်လိုက်ရင် ငါးခံတွင်း စုတ်ပြဲသွားလို့ နာကျင်သလို မင်းလည်း နာကျင်ရမှာပဲ။ ဒါပေမဲ့ မင်း ဆေးပြတ်နိုင်တယ်။ ငါးမျှားချိတ်ကလည်း မင်းပါးစပ်ထဲရောက်နေပြီ၊ လွတ်ကလည်း လွတ်ချင်တယ်၊ အသက်မသေချင်ဘူးဆိုရင်တော့ ခံတွင်းနာတာလောက်ကိုတော့ ထည့်မတွက်သင့်တော့ဘူးပေါ့။
ေ
နောက် ငါးမျှားချိတ်ကို လာဟပ်မိတဲ့ ဖားလိုတော့ မင်းကို မဖြစ်စေချင်ဘူး။ ဖားက ငါးမျှားချိတ်ကို ဟပ်လိုက်ရင် သူ့ဗိုက်ထဲထိ မြိုချပစ်တာတဲ့။ အဲဒီလိုဆိုတော့ ငါးမျှားချိတ် မြိုချမိတဲ့ ဖားဟာ ငါးလောက်တောင် အခွင့်အရေး မရှိဘူး။ သူ့အတွက်ကတော့ ဘယ်လောက်အနာခံရုန်းရုန်း သေဖို့ တစ်လမ်းပဲ ရှိတော့တယ်။ အဲဒီတော့ ငါက မင်းကို ငါးမျှားချိတ် မြိုချမိတဲ့ ဖားတော့ မဖြစ်စေချင်ဘူး။ ဖားလား၊ ငါးလားဆိုတာတော့ မင်း အသိဆုံး ဖြစ်မှာပဲ။
(၆)
သူ့မျက်နှာအရတော့ စိတ်ဝင်စားသည့်အမူအရာ ပြနေတယ်။ သူ့ထက်ပိုစိတ်ဝင်စားနေပုံပြတာက ဘေးနားက အိန္ဒိယဒကာမကြီး။ အရမ်းကောင်းတယ်၊ အရမ်းကောင်းတယ်လို့လည်း ပြောနေတယ်။ ဆေးစွဲနေသူ ဒကာကတော့ နောက်တစ်ပတ်လည်း သူ လာဦးမယ်လို့ ပြောပါတယ်။ တကယ်လာမလာတော့ မပြောတတ်။ သူ့ကို ပြောရင်းနဲ့ ကိုယ့်ပါးကို ကိုယ်ပြန်စမ်းမိတယ်။ ငါးမျှားချိတ်ဒဏ်တွေများ ရှိနေမလားပေါ့။ မှန်ပြတင်းကနေ အပြင်ဘက်ကို စောင်းငဲ့ကြည့်မိတယ်။ ငါးမျှားချိတ်တွေ ဝဲကာလွင့်ကာ ပြေးလွှားနေကြတာကို တွေ့လိုက်ရတယ်။ ငါးမျှားချိတ်ဆိုတာ သူ့သဘာဝအရ နာကျင်မှုပေးတတ်ပေမဲ့ ကိုယ်သွားဟပ်မှ ချိတ်မိတာပါ။ မတော်တဆ ဟပ်မိခဲ့ရင်တောင် ကိုယ်တိုင်က ငါးဖြစ်တာထက် ဖားမဖြစ်ဖို့တော့ အလွန်အရေးကြီးလှပါတယ်။
(၇)
အင်း ….. ဖားလား …. ငါးလား …. ။ ။
No comments:
Post a Comment