ရေပေါ်သောင်ကျေးရွာများရဲ့ ကံကြမ္မာ ဆောင်းပါး ဓာတ်ပုံများ

ဆောင်းပါးတင်တုန်းက ဓာတ်ပုံတွေနဲ့အတူ တင်ဖို့ပါပဲ။ ကွန်နက်ရှင်းမကောင်းတာကြောင့် မတင်ဖြစ်ခဲ့ဘူး။ ဓာတ်ပုံတွေထဲမှာ အချို့ပုံတွေက ရေပေါ်သောင်ကျေးရွာကမ်းပြိုနေတာတွေ၊ အချို့ပုံတွေက ကျောက်စုပ်ပြီး ကျောက်တွေကို တင်ဆောင်နေတဲ့ သင်္ဘောတွေ၊ အချို့ပုံတွေက ဓနုဖြူခံတပ်နဲ့ စစ်သူကြီး မဟာဗန္ဓုလကျဆုံးရာနေရာ စသဖြင့်ပေါ့။ အချို့ ဆည်းဆာပုံတွေကတော့ ကင်မရာမန်းန် ခင်ဦး လက်စွမ်းပြထားတာတွေပါ။ ဆောင်းပါးနဲ့ တွဲကြည့်ရင်တော့ ပိုကောင်းမယ်။

မှားပြီးရင်း မမှားသင့်တော့ပါ…

လောကတွင် ဘုရားပွင့်လာခြင်းသည် လောကကောင်းကျိုးအတွက် ပွင့်တော်မူလာခြင်း ဖြစ်သည်၊ ကောင်းကျိုးဆိုသည်မှ လူ့လောကတစ်ခုတည်းအတွက် မဟုတ်..စကြာဝဠာတစ်ခုလုံးကိုဆောင်သော ကောင်းကျိုးအတွက် ဖြစ်သည်၊ နေရာတစ်ခုတည်းအတွက်မဟုတ်သလို နိုင်ငံတစ်ခုတည်းအတွက်လည်း မဟုတ်…။ ထို့ကြောင့် နိုင်ငံတစ်ခုအတွက် ဘုရားစကားကို အကိုးအကားပြု၍ ကောင်းအောင် ဆောင်ရွက်နေခြင်းသည်ပင် ဘုရား၏ရည်ရွယ်ချက်နှင့် နှိုင်းစာပါက အလွန်ပင်သေးငယ်၍ စာမဖွဲ့လောက်ချေ..

ကျွန်ုပ်တို့နိုင်ငံသည် ဗုဒ်ဓဘာသာနိုင်ငံတစ်နိုင်ငံဖြစ်သည်၊ တစ်ဆက်တည်းတွင်လည်း ဗုဒ်ဓအဆုံးအမ ပျောက်ဆုံးနေသောနိုင်ငံလည်း ဖြစ်နေပြန်သည်၊ ဗုဒ်ဓက အရာရာတွင် ကောင်းကျိုးနှင့်ယှဉ်သော မေတ္တာတရား၊ ကရုဏာတရား၊ ကိုယ်ချင်းစာတရား ထားကြဖို့ဆုံးမထားသော်ငြား ထိုစရိုက်လက္ခဏာများသည် လက်တွေ့ဘ၀တွင် မရှိ…ထို့ကြောင့်ပင်လျှင် တောင်မြို့ဆရာတော်ဘုရားကြီးက ဗုဒ်ဓဘာသာကြောင့် မြန်မာလူမျိုးများ အောက်ကျနောက်ကျဖြစ်နေရတာ မဟုတ်ဘဲ မြန်မာလူမျိုးကြောင့်သာ ဗုဒ်ဓဘာသာ အောက်ကျ နောက်ကျဖြစ်ရကြောင်း ပွင့်လင်းစွာပင် မိန့်မှာထားခဲ့သည်၊ ဆိုရလျှင် ဗုဒ်ဓဘာသာတည်းဟူသော ရွှေတုံးရွှေခဲကြီးသည် မြန်မာနိုင်ငံတည်းဟူသော ချီးတွင်းထဲသို့ ကျရောက်နေ၍ မစင်အလူးခံနေရ သည့်သဘော...ထို့ပြင် အနော်ရထာဘုရင်က သထုံမနုဟာမင်းထံ သံတမန်များ စေလွှတ်၍ ပိဋကတ်တော်များ အပင့်ခိုင်းလိုက်သောအခါ မနုဟာမင်းက ``မင်းတို့လူရိုင်းတွေနဲ့ ပိဋကတ်တူသလား..တန်သလား``ဆိုပြီး တမန်များကို နှင်လွှတ်သည်ဟုလည်း မှတ်သားရဖူးသည်၊ မနုဟာမင်း အမှန်တကယ်ပြောမပြောဆိုသည်ကို မသိနိုင်သော်ငြား မြန်မာလူမျိုးတို့၏ စိတ်ဓာတ်တို့သည်ကား အမှန်ပင် လူရိုင်းအဆင့်ထက် မပိုလာသေး..

မြန်မာနိုင်ငံတွင် ရဟန်းတော်များ နိုင်ငံရေးလုပ်ခွင့်မရှိဟု ဆိုသည်၊ အတော်ပင် စဉ်းစားစရာကောင်းသော တားမြစ်ချက် ဖြစ်သည်၊ စဉ်းစားစရာကောင်းသည်ဆိုသည်မှာလည်း ရဟန်းတော်ဖြစ်နေသောကြောင့်ဟု ဆိုချင်သည်၊ နိုင်ငံရေးမလုပ်ရဟုဆိုလျှင် နိုင်ငံရေးဆိုသည်ကို မည်သို့ဆွဲထုတ်၍ မည်ကဲ့သို့ လက်ဆုတ်လက် ကိုင်ပြမည်နည်း…နိုင်ငံတစ်နိုင်ငံ၏ အရေးကိစ္စမှန်သမျှ နိုင်ငံရေးဟူသောခေါင်းစဉ်အောက်မှ လွှတ်ကင်း နိုင်သည်ဟူ၍ရှိနိုင်မည်လော့…ဆိုရလျှင် ဘာသာရေးသည်လည်း နိုင်ငံတစ်နိုင်ငံ၏ အရေးကိစ္စတစ်ခုပင် ဖြစ်သည်၊ ထို့ပြင် ဘာသာရေးသည် နိုင်ငံတစ်နိုင်ငံ၏ အရေးအကြီးဆုံးသော နိုင်ငံရေးတစ်ခုလည်း ဖြစ်သည်၊ အဘယ့်ကြောင့်ဆိုသော် လူတိုင်းအထွတ်အမြတ်ထားရသောကြောင့် ဖြစ်ပါသည်၊

နိုင်ငံရေးမကောင်းလျှင် ဘာသာရေးသည်လည်း တည်တံ့၍ မနေနိုင်ပုံကို သာသနာ့သမိုင်းအစဉ်အဆက်က သက်သေပြခဲ့ပြီး ဖြစ်သည်၊ နိုင်ငံတစ်နိုင်ငံကောင်းစားရန်အတွက် ထိုနိုင်ငံ၏ခေါင်းဆောင် (သို့မဟုတ်) အာဏာပိုင်အဖွဲ့အစည်း ကောင်းဖို့လိုအပ်သည်၊ ထို့ကြောင့်ပင် ဗုဒ်ဓဘာသာနှိုက် မင်းကျင့်တရားဆယ်ပါးဆို သည်ကို ထင်ထင်ရှားရှား ဖော်ပြထားပြီး ဖြစ်သည်၊ ထို့ပြင် ဇာတ်တော်များတွင်လည်း နိုင်ငံကို အုပ်ချုပ်သော မင်းများ အသုံးမကျ၍ နိုင်ငံပျက်စီးရပုံများ…မင်းကောင်းများ အုပ်ချုပ်သော တိုင်းပြည်တွင် စည်ပင်ဝပြော၍ ပြည်သူအများ စိတ်ချမ်းသာရပုံများမှစ၍ ဝေသာလီပြည် လိစ္ဆ၀ီမင်းများကို အဇာတသတတ်မင်း မအောင်နိုင်ခြင်းအဆုံးအထိ ဘုရားရှင်ကိုယ်တော်တိုင် ဟောထားချက်များ အထင်အရှား ပင် ရှိနေပါသည်၊ ထိုအကြောင်းအရာများကို အခြေခံ၍ ဗုဒ်ဓဘာသာရဟန်းတော်များက နိုင်ငံ့ခေါင်းဆောင်များနှင့် ပြည်သူပြည်သား အပေါင်းကို ဟောပြောလမ်းညွှန်ပေးခြင်း၊ လမ်းမှားနေသည်များကို ဝေဘန်ထောက်ပြ၍ တည့်မတ်ပေးခြင်းများသည် နိုင်ငံရေးဖြစ်သည်ဆိုလျှင်ပင် မည်ကဲ့သို့သော အကြောင်းကြောင့် လက်မခံနိုင်ရသနည်း… ထိုကဲ့သို့ဟောပြောသော ရဟန်းတော်သည်လည်း မြတ်စွာဘုရား၏ မည်သည့် ဥပဒေကို ချိုးဖောက်မိပါသနည်း..ထိုကဲ့သို့ နိုင်ငံတစ်နိုင်ငံ၏ အကိုးကွယ်ခံ ဘာသာရေးခေါင်း ဆောင်များက နိုင်ငံ့ခေါင်းခေါင်းဆောင်များ၊ ပြည်သူပြည်သားများကို ဘာသာရေးနည်းလမ်းများနှင့်အညီ ဟောပြော ညွှန်ပြခြင်းမျိုးကိုသော်မှ လက်မခံနိုင်လျှင် ထိုနိုင်ငံအတွက် ဘာသာရေးဆိုသည်မှာလည်း လိုအပ်တော့မည် မဟုတ်ချေ…ထို့ကြောင့် အသေအချာ စဉ်းစားကြစေလိုပါသည်၊

ထို့ပြင် ဗုဒ်ဓဘာသာဆိုသည်က ပရဟိတဘာသာတစ်ခုလည်း ဖြစ်သည်၊ စွန့်လွှတ်မှု..အနစ်နာခံမှုများကို ဇောင်း ပေးသည်၊ နိုင်ငံရေးဆိုသည်ကလည်း စင်စစ်အားဖြင့် သူတစ်ပါးအကျိးအတွက် ကိုယ့်ကိုအနစ်နာခံ၍ ဆောင်ရွက်ရခြင်းပင် ဖြစ်သည်၊ တကယ်အနစ်နာမခံနိုင်လျှင် တကယ့်နိုင်ငံရေးကိုလုပ်၍မရ.. စိတ်ထားအ လွန်မွန်မြတ်သော သူများသည်သာလျှင် ကိုယ်ကျိုးမဖက်သောနိုင်ငံရေးစစ်စစ်ကို လုပ်နိုင်စွမ်းရှိသည်၊ ရဟန်းတော်များအဖို့ နိုင်ငံကောင်းစားဖို့ရန် လုပ်ဆောင်ရာတွင် လူသားနိုင်ငံရေးသမားများ ကဲ့သို့ ၀န်ကြီးချုပ်ရာထူး၊ သမ္မတရာထူးမျိုးကို မျှော်ကိုး၍လည်းမရ..လစာရိက္ခာလည်း မျှော်လင့်၍မရ.. မျှော်လင့်၍လည်း မည်သူမျှ မလုပ်.. နိုင်ငံတစ်နိုင်ငံ၏ ဘာသာရေးခေါင်းဆောင်များအနေဖြင့်သာ နိုင်ငံ၏အကျိုးကို တတ်စွမ်းသည့်ဘက်က သည်ပိုးခြင်းသာဖြစ်သည်ဟု အခိုင်အမာဆိုနိုင်ပါသည်၊ ထို့ကြောင့် တိုင်းပြည်ကောင်းစားရန် စေတနာ၊ကရုဏာရှေ့ထား၍ လုပ်ဆောင်ခြင်းသည် ဗုဒ်ဓ၏ လမ်းစဉ်မှ သွေဖည်သည်ဟူ၍ အမြင်ကျဉ်းမြောင်းပြီး အစွန်းမရောက်သင့်ပေ..

ယနေ့သတင်းများတွင် ရွှေည၀ါဆရာတော်ကို လူဝတ်လဲရန်အတွက် သံဃာ့နာယကဆရာတော်များနှင့် အာဏာပိုင်များက စီစဉ်နေသည်ဟု ကြားသိရ၍ အလွန်ပင် စိတ်မကောင်းဖြစ်မိရပါသည်၊ ယခုလိုမျိုး တစ်နိုင်ငံလုံးအတိုင်းအတာဖြင့် တဖြည်းဖြည်းချင်း ပြောင်းလဲနေသည့်ဒီမိုကရေစီနိုင်ငံသစ်အတွက် ပြည်သူပြည် သားအားလုံးက မင်္ဂလာယူနေသည့်အချိန်တွင် ဤသတင်းသည် နတ်သုဒ်ဓာထဲ မစင်တစ်စက်ကျ သကဲ့သို့ပင် စက်ဆုပ်စရာလည်းကောင်းလှသည်။ ဤကဲ့သို့သော လုပ်ရပ်များက ပြည်သူများ၏ အတွေးကို နောက်ပြန်ရောက်သွားစေနိုင်သည့် အန္တရာယ်ရှိသည့် လုပ်ရပ်ဟုလည်း ဆိုနိုင်ပါသည်၊ ဒီမိုကရေစီအစိုးရ ခေတ်တွင် ယခုကဲ့သို့သော လုပ်ရပ်မျိုး ထွက်ပေါ်လာမည်ဟု မည်သူမျှ မျှော်လင့်မထားကြ.. ဤကဲ့သို့သော လုပ်ရပ်များသည် အတိတ်တွင် ကျန်ခဲ့ပြီဟု မရဲတရဲတွေးနေရသေးသည့်အချိန်မျိုးတွင် ခေတ်နောက်ပြန် ဆွဲသည့် လုပ်ရပ်များသည် ဖြစ်လည်းမဖြစ်သင့်တော့ပါ…ထို့ပြင် ယခင်အစိုးရ၏လုပ်ရပ်များအတွက် ပြည်သူလူထု၏ ယုံကြည်မှုကို ခက်ခက်ခဲခဲ ရယူနေရသည့် အစိုးရသစ်အတွက်လည်း အခြေတည်ခါစဖြစ်သော ပြည်သူလူထု၏ ယုံကြည်မှုတို့သည် ရုတ်ခြည်းပျောက်ကွယ်သွားနိုင်ပါသည်၊ ထို့ကြောင့် ပြည်သူလူထု၏ စိတ်အားတက်ကြွမှုများကို ယခုလိုခေတ်ဟောင်းလုပ်ရပ်များဖြင့် မရိုက်ချိုးသင့်ပါ..။

သံဃာ့နာယကဆရာတော်များအနေဖြင့်လည်း ယခုလုပ်ရပ်ထက် အရေးကြီးသောအရာများ နိုင်ငံအတွင်းတွင် ဖြစ်ပွားနေသည်ကို သတိထားစေလိုပါသည်၊ သာသနာ့သမိုင်းတွင် တိုင်းပြည်အတွက် တရားဟော၍ သာသနာပျက်သွားသည်ဟု တပည့်တော်များ မကြားစဖူးပါ..၊ ယခုရွှေည၀ါဆရာတော်၏ တရားကြောင့်လည်း ပြည်သူအများ လမ်းမှားမရောက်နိုင်ပါ..၊ လမ်းမှန်ကိုသာ ညွှန်ပြခြင်းဖြစ်ပါသည်၊ သာသနာကိုလည်း အကြည်ညိုမပျက်နိုင်ပါ..၊ သို့သော် ဆရာတော်များ၏ လုပ်ရပ်ကြောင့်ကား ပြည်သူပြည်သားများကြားတွင် အကုသိုလ်ပွားနိုင်ပါသည်၊ ထို့ပြင် ဆရာတော်ဘုရားများအနေဖြင့်လည်း ကိုယ့်ကိုယ်ကို စွပ်စွဲခြင်းဘေး၊ သူတစ်ပါးတို့က ကိုယ့်ကို စွပ်စွဲလာမည့် ဘေးများကိုလည်း သတိချပ်စေလိုပါသည်၊ ဆရာတော်များအနေဖြင့် ယခုလုပ်ရပ်အတွက် မိမိကိုယ်မိမိ လိပ်ပြာသန့်သည်ဆိုလျှင်ပင် ပြည်သူအများက ဆရာတော်များ၏ လုပ်ရပ်အတွက် နှာခေါင်းရှုံ့နေကြပြီ ဆိုသည်ကို အင်တာနက်သုံးတတ်သော တပည့်တပန်းများကို ကွန်ပျူတာအဖွင့်ခိုင်း၍ ရှုစားစေလိုပါသည်၊ ဆရာတော်များသည် သံဃာကို ကိုယ်စားပြုသည်ဟုဆိုလျှင် သံဃာထု၏ အသံကိုလည်း နားထောင်သင့်ပါသည်၊ စက်တင်ဘာအရေးအခင်းက ကျဆင်းသွားသော သံဃာ့နာယက၏ ဂုဏ်သိက္ခာများကို ယခုလို ငါတကော ကောသည့်လုပ်ရပ်များဖြင့် ထပ်ဆင့်ကျဆင်းအောင် မလုပ်သင့်တော့ပါ…သံဃာကို ညှဉ်းဆဲခြင်းကို ဘုရားမကြိုက်မှန်း ဆရာတော်များလည်း အသိပင် ဖြစ်ပါသည်၊ ဆရာတော်များ၏ ယခုလုပ်ရပ်ကြောင့် သံဃာတော်များ အလွန်စိတ်ဆင်းရဲနေကြရပါသည်၊ မေတ္တာတရား ထားစေလိုပါသည်၊ တကြိမ်တစ်ခါ လောက်ပင်ဖြစ်ဖြစ် သံဃာဖက်က ရပ်တည်ပေးစေလိုပါသည်၊

အထူးအားဖြင့် ဥက္ကဋ္ဌဆရာတော်ကို အထူးပန်ကြားလိုပါသည်၊ ဆရာတော်၏ ပညာဂုဏ်၊ အာစာရဂုဏ်များကို သံဃာအများက လေးစားသမှုပြုကြပါသည်၊ အထူးအားဖြင့် ဆရာတော်၏ သမာသမတ်ကျမှုကို သံဃာများက အထူးမျှော်လင့်ထားကြပါသည်၊ ယခုကိစ္စသည် ဆရာတော်၏ ဂုဏ်သိက္ခာနှင့် တိုက်ရိုက်ဆက်စပ်နေသော ကိစ္စဟုလည်း ဆိုနိုင်ပါသည်၊ ထို့ကြောင့် ရဟန်းရှင်လူများအနေဖြင့်လည်း ဆရာတော်၏ နောက်ဆုံးရွေးခြယ်မှု ကို အထူးစောင့်ကြည့်လျှက်ရှိပါကြောင်း…..

ရှင်သံသုဒ်ဓိ

၁၂-၁၅-၂၀၁၁

မဟနလား ... သွား ....

သမိုင်းရဲ့ အမည်းစက်ဖြစ်မှာ စိုးရိမ်ပေမယ့် တကယ့်ကို မဟာအမည်းစက် ဖြစ်ခဲ့ပြီ။ နိုင်ငံတော် သံဃမဟာနာယက အဖွဲ့တဲ့။ စက်တင်ဘာ သံဃာ့အရေးအခင်းမှာလည်း ကိုယ့်ပေါင်ကို လှန်ထောင်းတာဖြစ်မှာစိုးလို့ နည်းနည်းပဲ ပြောခဲ့တယ်။ ပြည်သူတွေကလည်း ခပ်ကြိတ်ကြိတ်ပဲ အံကျိတ်ပြီး သည်းခံခဲ့တယ်။ အခုလည်း ရွှေည၀ါဆရာတော်ကို ထုတ်ပြန်လိုက်တဲ့ ထုတ်ပြန် ချက်က အတော်ကို ကျက်သရေမဲ့နေတယ်။ ဖတ်ရသူတိုင်းက မဟနဆိုတာ ဘာလဲ၊ ဘယ်လဲ မေးကုန်ကြပြီ။

အပြောင်းအလဲလေးတွေ တွေ့လာရပြီဆိုပြီးတော့ ပြည်သူတွေ မျှော်လင့်ချက်လေးတွေ နည်းနည်းဖြစ်လာနေတဲ့အချိန်၊ လူတိုင်းက အမှန်တရားဘက် ရဲရဲဝံ့ဝံ့ ရည်တည်လာတဲ့အချိန်မှာ ဒီ မဟနအဖွဲ့က ဘာဖြစ်လို့ အခုချိန်ထိ ညစ်ပတ်စုတ်ပဲ့နေရသလဲ။

ရွှေည၀ါဆရာတော်လုပ်ဆောင်နေတဲ့ လုပ်ဆောင်ချက်တွေကို ပြည်သူတွေ၊ ရဟန်းပရိသတ်၊ လူပရိသတ် အားလုံးက သာဓုခေါ်နေကြတဲ့အချိန်။ အမှန်တကယ်လည်း ရွှေည၀ါလုပ်ဆောင်ချက်တွေက မွန်မြတ်လှပါတယ်။ သံဃာအပါး ၁၀၀၀-ကျော်ကို စာသင်နေတယ်။ သာဓုကျောင်းတိုက်မှာ နေ့စဉ်နဲ့အမျှ သံဃာတွေ စာပေလိုက်စားနေကြတယ်။

သာသနာမှာ ဓမ္မန္တရာယ်၊ ဓမ္မန္တရာယ်နဲ့ ပြောနေကြတယ်။ အဲဒီ မဟနတွေ နားလည်သလား၊ သို့မဟုတ် နားလည်ပေမယ့် မနာလိုမှုတွေ ရင်ဘတ်အပြည့် သိုသိပ်ပြီး “စာသင်တာတွေ ရပ်”လို့ အမိန့်ပေးရသလား။ စစ်အာဏာရှင်များ လက်အောက်မှာ စစ်အာဏာရှင်များ အလိုကျ ဆုံးဖြတ်ရတယ်ဆိုရင် မဟနကို သည်းခံပေးစရာအကြောင်း ရှိသေးတယ်။ အ ခုလို နယ်ပယ်ပေါင်းစုံ၊ သတင်းဂျာနယ်များ၊ အနုပညာရှင်များပါ မကျန် အပြောင်းအလဲအကြောင်းကို ရဲရဲဝံ့ဝံ့ ပြောင်ပြောင်တင်းတင်း ပြောနေကြတဲ့အချိန်မှာ နိုင်ငံတော် တိုးတက်ရေး၊ လူငယ်စာရိတ္တပြုပြင်ရေးတွေ ဟောနေတာကို ဘယ်လိုသဘောနဲ့ ပိတ်ပင်ရပါသလဲ။ ဘယ်လို နားလည်ရမလဲ။

ဒီနေ့ ရွှေည၀ါဆရာတော်ရှိရာ သာဓုပရိယတ္တိကျောင်းတိုက်ကို ရောက်တော့ လူတွေ ပြည့်နေပါတယ်။ တစ်နေ့လုံး ပြည့်နေတယ်လို့ ဆိုပါတယ်။ “ဦးကုသလရေ .... တပည့်တော်ကို အခုလို စိုးရိမ်ပေးတဲ့ ပြည်သူတွေ၊ သံဃာတွေကို တပည့်တော် ကျေးဇူးတင်ပါတယ်။ တပည့်တော်အလိုအရဆိုရင်တော့ ထောင်ထဲပဲ သွားတော့မယ်။ ဘယ်တော့မှ အညံ့မခံဘူး၊ အောက်မကျို့ဘူးလို့ပဲ။ ဒါပေမယ့် သံဃာတွေရဲ့ မျက်နှာ၊ သူတို့ရဲ့ ရှေ့ရေးကို ငဲ့ပြီး တပည့်တော် စာရေးနေတယ်”လို့ မိန့်ပါတယ်။ “ဆရာတော် .... ဆရာတော့်ဘက်မှာ မြန်မာတစ်မျိုးသားလုံး ရှိပါတယ်။ (မဟန မပါ) သံဃာတွေက ဆရာတော့်ဘက်မှာ ရှိပါတယ်”လို့ပဲ ဆရာတော့်ကို လျှောက်ထားမိပါတယ်။

မဟနက ထုတ်ထားတဲ့ စာကိုတော့ စာဖတ်သူများ ဒီလင့်ကနေ သွားကြည့်နိုင်ပါတယ်... လိုင်းတွေမကောင်းလို့ ပုံတွေ တင်မရတာနဲ့ လင့်ပဲ ပေးလိုက်တယ်။

ရွှေည၀ါဆရာတော် စာသင်သား သံဃာအပါး ၁၀၀၀ ကျော်ကို စာသင်နေတာကို ရပ်ခိုင်းတာ၊ အနှောက်အယှက်ပေးတာဟာ ဓမ္မန္တရာယ်ဖြစ်၊ မဖြစ် လူငယ်စာသင်သားတွေတောင် သိနေကြပြီ။ ဒီ မဟနတွေကတော့ ....

မဟနရဲ့ ဒီသမိုင်းအမည်းစက်ကြီးကတော့ ဘာသာခြားတွေရှေ့မှာ ဘယ်လို မျက်နှာမျိုးနဲ့ ဗုဒ္ဓဘာသာဟာ မြန်မာတွေရဲ့ ရှေ့ဆောင်လို့ ပြောနိုင်တော့မလဲ .... ဗုဒ္ဓဘာသာဟာ တိုင်းပြည်နဲ့လူမျိုးအကျိုးကို ကာကွယ်နေပါတယ်လို့ ပြောဖို့ဆိုရင် ဒီမဟနရဲ့ လုပ်ရပ်တွေက ကန့်လန့်ခံနေတော့မယ်။ အတော်ရှက်ဖို့ ကောင်းပါတယ်။

ဒီလိုတွေ ပြောလို့ အင်းစိန်သွားရမယ်၊ အ၀ီစိသွားရမယ်ဆိုရင် ရှင်ကုတို့ ထိပ်ဆုံးတန်းက ပျော်ပျော်ကြီး သွားမယ် ....

ရေပေါ်သောင်ကျေးရွာများရဲ့ ကံကြမ္မာ

(ရေပေါ်သောင်ကျေးရွာများ တည်ရှိရာ ရေပေါ်သောင်ကျွန်းခရီးစဉ်လေးအကြောင်း ရေးထားတာပါ။ ဓာတ်ပုံတွေကိုတော့ နောက်နေ့မှ တင်ပေးပါ့မယ်။ ကိုယ်ပိုင်အင်တာနက်မဟုတ်လေတော့ ဟိုဟာကျန်ခဲ့၊ ဒီဟာ ကျန်ခဲ့နဲ့။ နောက်ပြီး ကွန်နက်ရှင်းကလည်း ဘာမှ ဖွင့်မရအောင် ဖြစ်။ ဒါနဲ့ အဆင်မပြေနိုင် ဖြစ်ရတယ်။ စာတင်ရတာက လွယ်ပေမယ့် ဓာတ်ပုံတင်ဖို့က များသောအားဖြင့် အတော်စိတ်ညစ်ဖို့ ကောင်းပါတယ်။ ဘာပဲဖြစ်ဖြစ် မနက်ဖြန်မှာ အချိန်ပေးပြီး ဓာတ်ပုံတွေ တင်နိုင်အောင် ကြိုးစားလိုက်ပါအုံးမယ်။ )

စာရေးသူသည် ခရီးသွားရတာ ၀ါသနာအလွန်ပါသူ ဖြစ်သည်။ မြန်မာပြည်အနှံ့၊ ရှမ်းပြည်၊ ရခိုင်ပြည်၊ ကိုကိုးကျွန်း၊ အထက် မြစ်ကြီးနား မေခ မလိခ စတဲ့ထင်ရှားတဲ့နေရာများနှင့် လက်လှမ်းမီရာ မြို့ကျေးရွာများဆီသို့ မကြာခဏ သွားရောက်လည်ပတ်တတ်သည်။ ဒေသတစ်ခုသည် နာမည်ကြီးသည်ဖြစ်စေ၊ မကြီးသည်ဖြစ်စေ သူ့နေရာနှင့်သူ စိတ်ဝင်စားစရာများ ရှိနေတတ်သည်ဟု ယူဆထားသူ ဖြစ်သည့်အလျောက် ခရီးကလည်း အသစ်ဖြစ်လျှင် အခြေအနေကလည်း ပေးလျှင် သွားလိုက်သည်သာ များလေသည်။

စာရေးသူ သွားခဲ့သည့်ခရီးများတွင် (ညောင်တုန်းမြို့နှင့် ဇလွန်ပြည်တော်ပြန်မှ လွဲ၍) ဧရာဝတီတိုင်း မပါဝင်ခဲ့ဖူးသေးပါ။ တစ်နေ့က သူငယ်ချင်းတစ်ပါးက ပြောသည်။ “၁၇-ရက်နေ့ကျရင် ဓနုဖြူမြို့ဘက်က ကမ်းပြိုလို့ ဒုက္ခရောက်နေတဲ့ ရွာတွေဆီကို ဆန်သွားလှူကြမယ်၊ ကိုယ့်လူလည်း အလှူမှာ ပါဝင်လို့ ရတယ်”ဟု ဆိုပါသည်။ ချက်ချင်းပင် စိတ်ဝင်စားသွားသည်။ သတင်းများတွင် ဧရာဝတီတိုင်းက ရွာအချို့က မိသားစုဝင်များ ကမ်းပြိုမှုကြောင့် အတိဒုက္ခရောက်နေကြောင်း ဖတ်ရသည်။ ထိုအချိန်ကတည်းက စိတ်ဝင်စားနေခဲ့သည်။

“ဧရာဝတီတိုင်းဆိုတာ ဧရာဝတီမြစ်ကို အမှီပြုပြီး လုပ်ကိုင်စားသောက်နေကြရတာ၊ အခု ဧရာဝတီက လူတွေကို ဒုက္ခပေးနေပြီလား မသိ”ဟု သူငယ်ချင်းတစ်ယောက်က ပြောသည်။ ထိုစကားကို သဘောမကျပါ။ ဧရာဝတီကို ထိလျှင် အမေထိသလို ခံစားရသည်။ “မဖြစ်နိုင်ဘူး၊ ဧရာဝတီကတော့ တမင်သက်သက် ဒုက္ခပေးမှာ မဟုတ်ဘူး၊ ဘယ်လိုပဲဖြစ်ဖြစ် ဧရာဝတီမှာလည်း သဘာဝတရားရဲ့ အမိန့်ကို နာခံရမှာပဲ၊ သဘာဝတရားကို မတရားလုပ်ရင် ဧရာဝတီလည်း သဘာဝတရားရဲ့ အထုအထောင်းကို ခံရမှာပဲ၊ ဒီလိုဆိုရင် သူ့ကို အမှီပြုနေတဲ့သူတွေလည်း သဘာဝတရားရဲ့ ဒဏ်ခတ်မှုကို ခံစားရမှာပဲ”ဟု တောင်တောင်အီအီ တွေးနေမိခဲ့သည်။

သူငယ်ချင်း၏ ဖိတ်ခေါ်မှုကို ချက်ချင်းလက်ခံလိုက်သည်။ ၁၇-ရက်နေ့ မနက်စောစော ရန်ကုန်က ထွက်ခွါမည်။ ဦးဆောင်စီစဉ်သူက မန္တလေးမြို့၊ မစိုးရိမ်တိုက်ဟောင်း၊ ပါဠိနယူပဒေသကျောင်း၊ ဆရာတော် ဦးနာဂိန္ဒ ဖြစ်သည်။ အလှူရှင် ဒကာဒကာမ ၅-ယောက်၊ ဦးနာဂိန္ဒ၊ ဦးတေဇိန္ဒ၊ ဦးပညာစာရတို့နှင့် စာရေးသူတို့ လိုက်ပါခဲ့ကြသည်။ မနက် ၇-နာရီဟု ပြောထားသော်လည်း အကြောင်းကြောင်းကြောင့် ၁၀-နာရီ ခန့်ကျမှ ထွက်ခွါဖြစ်သည်။ လမ်းတွေက အတော်လေး ကြမ်းတမ်းသည်။ လှိုင်သာယာထွက်တာနှင့် လမ်းများက ဖြောင့်ဖြောင့်မောင်းလို့မရအောင် ဆိုးသည်။ ချိုင့်ခွက်များကို ရှောင်မောင်းနေရတာနှင့် အချိန်အတော်ကုန်သည်။ ဗိုလ်မြတ်ထွန်းတံတားကို ဖြတ်ကျော်လိုက်သည်နှင့် များသောအားဖြင့် ကတ္တရာလမ်းကို မတွေ့ရတော့ပေ။ ကျောက်ခဲများ၊ ချိုင့်ခွက်များသာ ရှိတော့သည်။ “အော် ဇလွန်ပြည်တော်ပြန်သွားတဲ့ လမ်းတောင် ကောင်းကောင်းလေး လုပ်မပေးထားပါလား”ဟု တွေးပြီး စိတ်သောကဖြစ်မိသည်။ “ရန်ကုန်နဲ့ ဓနုဖြူဆိုတာ တကယ်တော့ ဘာမှ ဝေးတဲ့ခရီးမဟုတ်ဘူး၊ ဒီလို တ၀ုန်းဝုန်းနဲ့ ဖုန်မှုန့်တွေ တလိပ်လိပ်ထနေတဲ့ ခက်ခဲကြမ်းတမ်းတဲ့ခရီးကို နေ့စဉ်သွားလာနေကြရတဲ့ ဒေသခံများ ဘယ်လောက်တောင် ဒုက္ခရောက်ကြလိမ့်မလဲ”ဟု တွေးရင်း စိတ်ထဲမှာ တနုံ့နုံ့ ဖြစ်ခဲ့မိသည်။

နေ့လယ် ၁-နာရီခန့်တွင် ဓနုဖြူမြို့သို့ ရောက်သည်။ စာရေးသူက ဓနုဖြူကို ဓနုဖြူဟု မမြင်၊ စစ်သူကြီး မဟာဗန္ဓုလကိုသာ မြင်သည်။ စစ်သူကြီးသည် ဤမြေတွင် ကျဆုံးခဲ့သည်။ ဓနုဖြူမြို့ပေါ်က မဝေဆိုတဲ့ ပွဲရုံမှာ ရွာသူရွာသားများကို ဝေငှဖို့ ဆန်အိတ်များ ၀ယ်ကြသည်။ အညာသားက အောက်သားကို ဆန်ဝေမယ်ဆိုတာကို တွေးပြီး ပြုံးမိသေးသည်။ ဆရာတော်ဦးနာဂိန္ဒ ဦးဆောင်အလှူခံထားသော ငွေများဖြင့် ဆန်အိတ် ၅၀ ၀ယ်နိုင်ခဲ့သည်။ ဆန်အိတ်များကို ပဲ့ထောင် (စက်လှေ)ပေါ်သို့ တင်ပြီး ညနေ ၃-နာရီခန့်တွင် ဓနုဖြူမြို့လေးမှ ကမ်းပြိုဒုက္ခသည်များရှိရာ ရေပေါ်သောင်ကျေးရွာသို့ ဆန်တက်ခဲ့ကြသည်။

ဧရာဝတီမြစ်ကြီးပေါ်မှာ သွားနေရတဲ့ ခံစားမှုပီတိက ဘာနဲ့မှ လဲလို့ မရနိုင်ပါ။ ဧရာဝတီကို ဘာကြောင့် ချစ်သလဲ။ ကမ်းတစ်လျှောက်ဝဲယာမှ စိုက်ခင်းများ၊ ဥဒဟို စုန်၊ ဆန်သွားနေကြသော ပဲထောင်စက်လှေကြီးများ ကုန်တင်၊ ခရီးသည်တင် သင်္ဘောများကို ကြည့်လျှင် သိနိုင်ပါလိမ့်မည်။ ဧရာဝတီပေးကျွေးခဲ့သော ထမင်းလုတ်များကား မရေမတွက်နိုင်အောင် ရှိနေပါလိမ့်မည်။ မြန်မာပြည်သူတို့ထံတွင် အုံခဲတည်ရှိနေသော စွမ်းအားများအားလုံးသည် ဧရာဝတီ ခွံ့ကျွေးသော ထမင်းလုတ်များနှင့် မည်သူ ကင်းနိုင်ပါမည်လဲ။ ဧရာဝတီအပေါ်တွင် စာရေးသူတို့ ပေးဆပ်ရမည့်အကျွေးတွေ အမြောက်အများ ရှိနေသည်ဟု ခံစားမိခဲ့သည်။

“ဦးဇင်း ဟိုမှာ ကြည့်၊ အဲဒါ ဗန္ဓုလစစ်သူကြီး တည်ဆောက်ခဲ့တဲ့ ခံတပ်အဟောင်းကြီး”ဟု စက်လှေဆရာကြီးက လက်ညှိုးထိုးပြသည်။ “ကျုပ်ကို အဆိုးမြင်သူလို့ ပြောချင်လည်း ပြောတော့ဗျာ၊ ဘယ့်နှယ့်ဗျာ … ဒီလောက် သမိုင်းဝင်တဲ့ မြို့ရိုးကြီးကို ဒီအတိုင်း ပစ်ထားကြတယ်၊ ကြည့်စမ်းဗျာ၊ အပေါ်မှာ တဲအိမ်တွေ ဆောက်လုပ်ဆောက်၊ သစ်ပင်ကြီးတွေလည်း ပေါက်လို့၊ ထင်ရာတွေ ဖြစ်နေတာ၊ နောက်နှစ်လောက်ဆို ရေတိုက်စားသွားတော့မယ်”ဟု စာရေးသူ မြည်တမ်းမိသည်။ မြို့ရိုးအဟောင်းကြီးတွေ ပျက်တော့မည်။ လက်ပိုက်ကြည့်နေကြသည်။ “ဒီနေရာကို လူကြီးဆိုတဲ့သူတွေ တစ်ယောက်မှ လာမကြည့်ကြဘူးလားဗျ” “အော် အရှင်ဘုရားနှယ်၊ ဒီနယ်က စစ်သူကြီး ကျဆုံးသွားတဲ့ အရှုံးသမားရဲ့ နယ်လေဘုရာ့၊ မဟာဗန္ဓုလ ပြုတ်သွားတဲ့ မြေပေါ့၊ သူတို့က အစွဲကြီးတယ်၊ ဒီကို လာရင် နိမိတ်မကောင်းဘူးဆိုပြီး ဘယ်သူမှ မလာကြဘူး၊ အရှင်ဘုရား ကြည့်ပါလား၊ ဓနုဖြူမြို့နယ်မှာ အခြားလမ်းတွေက တော်တော်များများ ကတ္တရာလမ်းပေမယ့် ဗန္ဓုလစစ်သူကြီးရုပ်တုတည်ရှိတဲ့ ဒီ မြို့ဂုဏ်ရောင်လမ်းကတော့ မြေလမ်းကျောက်လမ်းပဲ ရှိသေးတယ်၊ နည်းနည်းမှ ပြုပြင်မပေးကြဘူး၊ စစ်သူကြီးရုပ်တုဘေးမှာလည်း ခြုံတွေ ပိတ်ဖုံးနေတယ်။ ဘယ်လိုကြည့်ကြည့်၊ စိတ်ချမ်းသာစရာတစ်ခုမှ မရှိဘူး၊ စိတ်ဆင်းရဲပါတယ်ဘုရား”ဟု ဆိုသည်။ “အော် ဖြစ်ရလေ”ဟုသာ အသံထွက်နိုင်ခဲ့သည်။

ဧရာဝတီမြစ်ကို တဖြည်းဖြည်း ဆန်တက်လာရင်း ကမ်းပြိုနေသော နေရာအချို့ကို တွေ့လာရသည်။ လူနေအိမ်ခြေများတော့ မရှိ။ စိုက်ခင်းလေးများက တအိအိ မြစ်ပြင်ထဲ ထိုးဆင်းကာ မြစ်ရေနှင့်အတူ ပါသွားနေကြသည်။ ပြိုနေသောကမ်းလေးများကို ကြည့်ရင်း စာရေးသူတို့ စကားတွေ ပြော၊ ဓာတ်ပုံတွေရိုက်နေကြတော့ ဧရာဝတီသူ ဒကာမကြီးက “အရှင်ဘုရား … ဒါက အပြိုလေးပဲ ရှိသေးတယ်၊ အပြိုကြီးတွေ မကြာခင် တွေ့ရတော့မယ်၊ အပြိုကြီးတွေ တွေ့မှ ရိုက်ကြ”ဟု ဆိုသည်။ ဒကာမကြီးစကားကြောင့် အားလုံး ရယ်မောခဲ့ကြသည်။

ရေပေါ်သောင်ကျေးရွာကို ရောက်ခါနီးတော့ လှေက ဒုန်းဆို ရပ်သွားသည်။ မြစ်ပြင်နှင့် မရင်းနှီးသော စာရေးသူတို့ အနည်းငယ် ဖြုံသွားခဲ့သည်။ “ဖြည်းဖြည်း၊ ဖြည်းဖြည်း၊ လှေကို နောက်ပြန်ဆုတ်၊ လှေကို နောက်ပြန်ဆုတ်”ဟု ပဲ့ကိုင်သူက အော်သည်။ လှေက အောက်က သောင်ပြင်ကို ထိသွားခြင်း ဖြစ်သည်။ “အော် ဦးဇင်းက ဒီရေတွေက အနက်ကြီးလို့ ထင်တာ၊ အခုတော့ မြစ်ပြင်ကျယ်ကြီးအလယ်မှာတောင် ၂-တောင်လောက်တောင် ရေက မနက်ပါလား”လို့ ပြောမိသည်။ “အရှင်ဘုရားတို့ ကံကောင်းတာ၊ စက်လှေက ကြီးလို့သာပေါ့၊ လှေသေးရင် အဲ့ဒီလို ရုတ်တရက် သဲခုံနဲ့ ၀င်တိုးရင် မှောက်တာပဲဘုရား၊ သတိထားပြီး မောင်းနေရတာ၊ ဧရာဝတီမြစ်ရေက ရေနက်ရှိတဲ့နေရာ ရွေးပြီးမောင်းနေရတာ၊ သင်္ဘောကြီးတွေဆို မောင်းလို့ မရတော့ဘူး၊ မောင်းရင်လည်း ရေလမ်းကြော ရှာပြီးမောင်းရတာ။ မိုးတွင်းလောက်ပဲ ရေများတော့တာ”ဟု ရှင်းပြသည်။ သူပြောမှ သတိထားကြည့်မိသည်။ စက်လှေကြီးတွေတောင် ၀ါးထောက်ပြီး ရေကြောင်းစမ်းကာ မောင်းနေရသည်။ “အော် ဧရာဝတီ၊ မင်း အားတွေ နည်းနေပြီလား”

ရေပေါ်သောင်ကျွန်းရွာလေးတွေကို ရောက်တော့ အတော်မှောင်သွားပြီ။ ရွာဦးကျောင်းက ဦးဇင်းတစ်ပါးနှင့် ဒကာအချို့ မြစ်ကမ်းကို လာကြိုသည်။ ဆိပ်ကမ်းဟူ၍ သက်သက်မှတ်မှတ်တော့ မရှိပါ။ အဆင်ပြေတဲ့နေရာမှာ ဆိုက်ကပ်ပြီး ကမ်းပေါ်တက်ကြရခြင်း ဖြစ်သည်။ ဘုန်းကြီးကျောင်းသို့ ဓာတ်မီးများ တ၀င်းဝင်းဖြင့် လယ်ကွင်းများ၊ စိုက်ခင်းများကို ဖြတ်ကာ သွားကြသည်။ ဒေသသစ်ကို သွားရသဖြင့် အားလုံးပျော်နေကြသည်။ ရွာဦးကျောင်းက မီးစက်ထွန်းထားသဖြင့် လင်းနေသည်။ ရွာဘက်မှာတော့ အများအားဖြင့် မှောင်သည်။

ရောက်ရောက်ချင်း ရွာဦးကျောင်းဆရာတော်ကို ၀တ်ချသည်။ ဆရာတော်ကြီးကား သက်တော် ၉၄-နှစ် ရှိပြီဖြစ်သည်။ နားကလည်း မကောင်းသဖြင့် စကားကို အကျယ်ကြီး ပြောရသည်။ “တပည့်တော်က မျက်စိကလည်း မကောင်း၊ နားကလည်း မကောင်းတော့ အရှင်ဘုရားတို့နဲ့ စကားပြောရမှာ အားနာတယ်၊ အဆင်ပြေသလို နေကြ”ဟု အမိန့်ရှိသည်။ စာရေးသူတို့က သိချင်တာများကို မေးကြသည်။ ဆရာတော်ကြီးသည် မြင်းခြံဇာတိ၊ အညာသားဖြစ်သည်။ သို့ရာတွင် ရေပေါ်သောင်ကျေးရွာသို့ ခဏအလည်လာရင်း ကလေးငယ်များကို စာသင်ပေးရာကနေ ကလေးများကို သံယောဇဉ်ဖြစ်ပြီး အပြီးနေထိုင်ဖြစ်သည်ဟု ဆိုသည်။ “တပည့်တော်က ၁၉၇၁-ခုနှစ်ကတည်းက ဒီရွာကို ရောက်တာ၊ တပည့်တော်ရောက်တုန်းက ဒီကျွန်းကို တစ်ပတ်ပတ်မိဖို့အတွက် မြင်းနဲ့တစ်နေကုန် သွားမှ ပတ်မိတယ်၊ အခုတော့ ဒီကျွန်းကို ပတ်မိဖို့ ခဏလေးပဲ၊ တဖြည်းဖြည်းနဲ့ ကျွန်းလည်း ကုန်ပါပြီ၊ ကျေးရွာသူတွေလည်း ဟိုပြေးဒီပြေးနဲ့ ဒုက္ခပါပဲ၊ တပည့်တော် ဒီကျောင်းတောင်မှ အရင်က ဟိုးဘက်နားမှာ၊ ကျောင်းကို ရွှေ့ရတာလည်း နှစ်ခါရှိသွားပြီ”စသဖြင့် ပြောပြသည်။ စိတ်ဝင်စားစရာ၊ မေးချင်မြန်းချင်တာများရှိသော်လည်း ဆရာတော်ကြီးကို အားနာသဖြင့် ဆက်မမေးဖြစ်ခဲ့ပေ။

ခဏနားပြီးတာနှင့် အဖွဲ့ခေါင်းဆောင် ဦးနာဂိန္ဒ ဦးဆောင်ကာ ဒုက္ခရောက်သူများအား ဆန်ဝေငှမည့်အစီအစဉ် ဆွဲကြသည်။ စာရေးသူတို့ ရေပေါ်သောင်ကျေးရွာကို ရောက်လာသည့်တိုင်အောင် ကျွန်းလေးမှာ သေးသေးလေးဟု ထင်လာခဲ့ကြသည်။ ရွာသူရွာသားများနှင့် စကားပြောကြည့်မှ ရေပေါ်သောင်ကျေးရွာဆိုသည်မှာ ခေါ်ရလွယ်အောင် နာမည်တစ်မျိုးတည်းကို အသုံးပြု ခေါ်ဝေါ်နေကြကြောင်း သိရသည်။ ရေပေါ်သောင်ကျေးရွာအုပ်စု သို့မဟုတ် ရေပေါ်သောင်ကျွန်းပေါ်တွင် ရေပေါ်သောင်၊ သရက်တော၊ တောင်စု၊ မအူကုန်း၊ ကျောင်းကုန်း၊ အလယ်ကင်း၊ ရွာသစ်ဟု ကျေးရွာပေါင်း ၇-ရွာရှိကြောင်း သိရသည်။ အရင်ကဆိုလျှင် ရေပြန်နှင့် သဲရိုးဟူသော ရွာနှစ်ရွာလည်း ထိုကျွန်းပေါ်တွင် ရှိသည်ဟု ဆိုသည်။ ကျွန်းကို ရေတိုက်စားပြီး ကမ်းပြိုသဖြင့် ရေပြန်ရွာနှင့် သဲရိုးရွာတို့မှာ မြစ်တစ်ဖက်ခြမ်းသို့ ရောက်ကုန်သည်။ ရေပေါ်သောင်ကျွန်းပေါ်တွင် လူဦးရေ ၄၀၀၀-ကျော်ရှိကြောင်း သိရသည်။

“ဒုက္ခပါပဲဘုရား၊ ကမ်းပြိုလို့ အိမ်တွေ ရွှေ့ရပြောင်းရတော့လည်း လက်ထဲ ပိုက်ဆံရှိတဲ့သူက ပြဿနာမရှိဘူး၊ တစ်ခြားနေရာမှာ မြေ၀ယ်ပြီး ရွှေပြောင်းလိုက်ရုံပဲဘုရား၊ တစ်ချို့ကျတော့လည်း အိမ်က ကမ်းပြိုတဲ့အထဲ ပါသွားပေမယ့် ယာခင်းတွေ ပိုင်ထားတော့ ယာခင်းထဲ သွားနေရုံပဲ။ တပည့်တော်တို့ကတော့ ပိုက်ဆံလဲ မရှိ၊ ယာခင်းလည်း မပိုင်ဆိုတော့ နေစရာနေရာကို မရှိတော့ဘူးဘုရား။ တပည့်တော်တို့လို လူတွေက အများကြီးပဲ”ဟု ဒကာမကြီးတစ်ဦးက ၀မ်းနည်းဖွယ် ပြောပြသည်။ “ဒီလိုဆို ဘယ်မှာ ဘယ်လို သွားနေကြတုန်း”ဆိုတော့ “ဒီလိုပဲ အခြားအိမ်ဝိုင်းထဲမှာ သင့်တော်တဲ့ဈေးနဲ့ အကြွေးဝယ်ပြီး နေရတာပေါ့”ဟု ဆိုသည်။ “ဒီကျွန်းမှာ အိမ်ကောင်းကောင်းလည်း မဆောက်ချင်ကြတော့ဘူး၊ ဘာလို့လည်းဆိုတော့ မြစ်ကမ်းက တဖြည်းဖြည်းချင်း ပြိုလာတော့ အိမ်ရွှေ့ရတာနဲ့ပဲ မပြီးနိုင်ကြတော့ဘူး။ အခုဆိုရင် ရွာသားတွေဆိုရင် အလုပ်ကို ကောင်းကောင်းမလုပ်နိုင်ကြတော့ဘူး။ အလုပ်လုပ်မယ်ရှိသေးတယ်၊ ဘယ်သူ့အိမ်တော့ ကမ်းပြိုတဲ့အထဲ ပါတော့မယ်၊ အိမ်ကို ၀ိုင်းဝန်းဖျက်ပေးကြဖို့၊ ရွှေ့ပြောင်းပေးဖို့ချည်းပဲ လုပ်နေရတယ်ဘုရား”ဟု ဆိုသည်။ ရပ်ရွာလူကြီးများကလည်း ကမ်းပြိုတဲ့ကိစ္စကို သူနှင့်မဆိုင်သလို ဘာအကူအညီမှ မပေးဟု ဆိုသည်။ အမှန်တကယ်ဆိုလျှင် သက်ဆိုင်ရာလူကြီးများနှင့်တိုင်ပင်ပြီး ဆင်းရဲသောကရောက်နေသူများကို တစ်စုံတစ်ရာ အကူအညီပေးဖို့ ကြိုးစားနေသင့်သည်။

နောက်နေ့ မိုးလင်းသောအခါ ကမ်းပြိုသည့်နေရာများသို့ စက်လှေဖြင့် လိုက်ပို့သည်။ “ဟိုးရှေ့က စေတီလေး တွေ့လားဘုရား၊ အဲဒီစေတီလေးက အရင်က ဟိုးဘက်နားလောက်မှာ ရှိတာ”ဟုဆိုရင်း မြစ်ပြင်ကျယ်ကြီးအလယ်ကို လက်ညှိုးညွှန်ပြသည်။ စာရေးသူတို့မျက်စိရှေ့မှာတင် မြစ်ကမ်းပါးများမှာ တ၀ုန်းဝုန်းပြိုကျနေသည်။ အရင်က ဒီမြစ်ကျောဆိုတာ ဟိုဘက်ဒီဘက် လှမ်းခေါ်လို့ ရလောက်အောင် ကျဉ်းမြောင်းသည်ဟု ဆိုသည်။ ယခုအခါ မြစ်ပြင်ကြီးမှာ တစ်ဖက်ကမ်းနှင့်တစ်ဖက်ကမ်း ပုံရိပ်များက ဝေေ၀၀ါးဝါးသာ တွေ့မြင်ရတော့သည်။ “အရှင်ဘုရား … ဟိုး ရှေ့က တွေ့နေရတဲ့အိမ်တွေနဲ့ သရက်တောကျောင်းဆိုရင် နောက်နှစ်မိုးတွင်းဆို မြစ်ထဲရောက်နေလောက်ပြီ၊ ဒီရက်ထဲမှာပဲ သရက်တောကျောင်းကို ရွှေ့ကြမယ်ဘုရား”ဟု ဒကာမတစ်ယောက်က ရှင်းပြနေသည်။ ယခုအချိန်မှာတောင် ၁၅၀-ကျော်ဟာ မြစ်ထဲပါသွားခဲ့ပြီးပြီ။ နောင်ဆိုရင် ရေပေါ်သောင်ကျွန်းလေးတစ်ခုလုံးပျောက်ကွယ်သွားတော့မယ်လို့တောင် ရွာသားတွေ ပြောနေကြသည်။ ဒီပြိုနှုန်းအတိုင်းသာဆိုလျှင် ရေပေါ်သောင်ကျွန်းလေးပေါ်က ရွာသားတို့၏ သောကနှင့်ငိုရှိုက်သံများကို နေ့စဉ် ကြားနေရပေအုံးမည်။

“နေစမ်းပါအုံး ဒကာကြီး၊ ဒီကမ်းပြိုတာတွေက ဘာဖြစ်လို့ ပြိုတာလဲ”ဟု မေးမိသည်။ စာရေးသူလည်း သဘာဝတရားနှင့် ဘူမိဗေဒပညာကို နားမလည်သဖြင့် သူတို့ အယူအဆကို သိလိုသဖြင့် မေးမိသည်။ “အရှင်ဘုရား တပည့်တော်တို့ ယုံကြည်တာကတော့ ကျောက်တူးသမားတွေကြောင့်ပါပဲ။ ကျောက်တူးသမားတွေက တပည့်တော်တို့ ရွာနားက မြစ်ပြင်မှာ ကျောက်တွေ ထုတ်ယူကြတယ်၊ သူတို့ ကျောက်တွေ ထုတ်ယူပြီဆိုရင် နည်းနည်းနောနော မဟုတ်ဘူး၊ သင်္ဘောနှစ်စီးစာ၊ နှစ်စီးစာနဲ့ သင်္ဘောအစီးပေါင်းများစွာ တူးယူကြတယ်။ အရှင်ဘုရား စဉ်းစားကြည့်ပေါ့၊ ကျောက်တင်သင်္ဘောတစ်စီးစာဆိုရင်ကို မြစ်ထဲမှာ ဂလိုင်တွင်းကြီး ဘယ်လောက်ကြီးနေမလဲဆိုတာကို။ ရေဆိုတာ နိမ့်တဲ့ဘက်ကို စီးတယ်။ ဂလိုင်တွင်းကြီးတွေရှိတော့ မြစ်ရေက တပည့်တော်တို့ ရွာဘက်ကို အားပြင်းပြင်းနဲ့ ဦးတည်စီးတော့တာပေါ့။ ရေအားတွေ အဆမတန်များပြီး ကမ်းကို ၀င်ဆောင့်တော့ ကမ်းတွေ ပြိုတာပေါ့ဘုရား၊ တကယ်တော့ ဒီဝိသမလောဘသမား ကိုယ်ကျိုးကိုယ်သာကြည့်တတ်တဲ့ သူဌေးတွေကြောင့်ပါပဲ”ဟု ဒကာကြီးက သူတို့ အယူအဆကို ပြောပြသည်။

စာရေးသူလည်း သဘာဝပတ်ဝန်းကျင်အကြောင်း၊ ပထ၀ီအကြောင်း ကောင်းကောင်းမသိသော်လည်း ဉာဏ်မီသလောက် စဉ်းစားမိသည်။ လမ်းတစ်လျှောက်မှာ ဥဒဟို ဆင်းတက်နေသော ကျောက်တူးသင်္ဘောကြီးများနှင့် သင်္ဘောပေါ်တွင် ကျောက်တွေတနင့်တပိုး တင်ပြီးခုတ်မောင်းနေကြသော သင်္ဘောကြီးများကို မြင်ယောင်မိသည်။ “နေပါအုံး၊ ရွာသူကြီးက ဒီကိစ္စကို အထက်ကို တင်ပြပြီး တစ်ခုခု မလုပ်ဘူးလား”ဟု ဆိုတော့ “မသိပါဘူးဘုရား၊ အခုချိန်ထိတော့ ဘာမှလုပ်တာ မရှိသေးဘူး၊ ဘာအကူအညီမှလည်း ရောက်မလာသေးဘူး။ ဒါပေမယ့် အရှင်ဘုရားတို့ တွေ့မိမယ် ထင်တယ်၊ မဏ္ဍပ်ထိုးထားတာလေ။ အဲဒါ လူကြီး လာမှာမို့တဲ့။ လူကြီးက အက်ျီနဲ့စားစရာအချို့ ဝေမယ်လို့ သိရတယ်။ ဒါကလည်း တပည့်တော်တို့ ဒုက္ခရောက်လို့ဆိုပြီး ဝေမှာ မဟုတ်ပါဘူး။ သူတို့ ရွေးကောက်ပွဲအတွက် မဲလာဆွယ်ကြတာပါ။ သူတို့ဝေတာ လက်ခံပြီးတာနဲ့ တပည့်တော်တို့က သူတို့ကို ထောက်ခံမဲပေးသူတွေ အလိုလို ဖြစ်သွားကြမှာ”ဟု ရှည်ရှည်ဝေးဝေး ရှင်းပြနေခဲ့သည်။

စိတ်မကောင်းဖြစ်ရုံ၊ ရင်လေးမိရုံမှတစ်ပါး ဘာမှ မတတ်နိုင်ခဲ့ပါ။ ဒုက္ခရောက်နေတာ၊ မြစ်ကမ်းပါးတွေ အချိန်တိုင်း ပြိုနေခဲ့တာကတော့ မျက်မြင်ကိုယ်တွေ့ ဖြစ်ပါသည်။ ကမ်းပြိုသည့်ကိစ္စဆိုတာ အစိုးရကိုယ်တိုင်က ရေရှည်ကာကွယ်တဲ့စနစ် လုပ်ဆောင်ပေးမှ အေးနိုင်မည့် အခြေအနေ ဖြစ်နေပါသည်။ တာဝန်သိပုဂ္ဂိုလ်များအနေဖြင့် လက်ပိုက်ကြည့်မနေသင့်တော့ပါ။ ရေပေါ်သောင်ကျွန်းလေး မကွယ်ပျောက်မီ စီမံကိန်းချ လုပ်ဆောင်နေသင့်ပါပြီ။

သူနှင့် သူ့တောလားများခေါ်ဆောင်ရာ….သို့

(တောလား ဆောင်းပါးတွေ ဆက်ရေးမယ်၊ ရေးမယ်နဲ့ မရေးဖြစ်တဲ့အချိန် တက္ကသိုလ်မှာ အတူတက်ခဲ့တဲ့ သူငယ်ချင်းက ဒီစာလေးတွေကို ပို့လာတယ်။ ဘာပဲဖြစ်ဖြစ် ပြောသင့်ပြောထိုက်တာလေးတွေ ပါလို့ သဘောကျလို့ တင်ပေးလိုက်တယ်။ စာအတင်ကျဲနေတဲ့အချိန်မှာ သူငယ်ချင်းရဲ စာလေးတွေက တစ်စုံတစ်ရာ ပေးနေပါလိမ့်မယ်)

ဒီနေ့အင်တာနက်ထိုင်တော့ သူငယ်ချင်းတစ်ယောက်က ``ကိုယ့်စာတွေ ဖတ်ဖြစ်လား`` ဟု မေးသည်၊ ``အခုမှ အင်တာနက်ရတာကိုယ့်လူရေ`` ဖြေလိုက်ရင်း သူငယ်ချင်း၏ ဆိုဒ်မှ လက်ရာများကို မြည်းစမ်းကြည့်မိသည်၊ အရင် သူနှင့်တွေ့တုန်းကတော့ သူရန်ကုန်သွားတောလားဆိုပြီး ရေးနေသည်ဟုတော့ ပြောဖူးသည်၊ ဒါပေမယ့် တစ်ခါမှ မဖတ်ဖြစ်၊ အလုပ်ရှုပ်လွန်းလို့တော့ မဟုတ်၊ ဖုန်းလိုင်းနှင့် အင်တာနက်သုံးရတာ အဆင်မပြေသောကြောင့် ဖြစ်သည်၊ ဒီနေ့တော့ ရန်ကုန်သွားတောလားများကို ဖတ်ရင်း ခေါင်းထဲသို့ တောလားကို ဖန်တီးသူ သူနှင့် တောလား၏ ခေါ်ဆောင်ရာကို မရည်ရွယ်ဘဲ လိုက်မိလျှက်သား ဖြစ်သွားခဲ့သည်၊

တကယ်တော့ သူသည် ယခင်(တက္ကသိုလ်)ကတည်းက လုပ်သည့်အတိုင်း ပြော၍ ပြောသည့်အတိုင်းလုပ်နိုင်ဖို့ ကြိုးစားနေသည့်သူဟု နားလည်ထားခဲ့သည်၊ ယခုသူသည် သူ၏စိတ်ကူးများကို လမ်းကြောင်းမှန်ပေါ်တွင် တည်တံ့ဖို့ ကြိုးစားနေဆဲ… လမ်းခရီးဆိုသည်က သွားနေလျှင် တစ်နေ့ရောက်သွားရမည်သာ ဖြစ်သည်၊ သူသည် သွားနေသောသူဖြစ်သည်၊ သွားနေသည်မှ ခပ်သုတ်သုတ်…တက္ကသိုလ်တက်တော့ သူနှင့်မိမိက ခုံချင်းကပ်လျက်...သူသည် တော်လှန်သောစိတ်ကူးဖြင့် အရာရာကို ရှုမြင်တတ်သူဖြစ်၍ သူ၏ အမူအရာများသည် အနည်းငယ်တော့ ဘုကလန့်ကျကောင်းကျနေနိုင်သော်ငြား သူသည် အတန်းထဲတွင် ဘက်စုံထူးချွန်သည့်သူဆိုသည်ကိုတော့ အားလုံးက လက်ခံထားကြရသည်၊ သူက ဘာသာစုံတွင် ထူးချွန်သူဖြစ်သည်၊ သူစိတ်ပါမည်ဆိုလျှင် နှစ်ဝက်စာမေးပွဲ၊ အတန်းတင်စာမေးပွဲများ၏ ပထမနေရာဆိုသည်က သူ့အတွက်သာ ဖြစ်သည်ဟုလည်း လက်ခံထားခဲ့သည်၊ နောက်ပိုင်းနှစ်များတွင် သူသည် စာကို စိတ်မ၀င်စားသလို လုပ်နေသည်ဟု သတင်းထွက်လာပြီး ထိုပုံစံကို မြင်ခဲ့ရသည့်တိုင် အောင်ဂေဇက်တွင် သူသည် အဆင့်သုံးနေရာကမကျ..ထို့ပြင် တက္ကသိုလ်ဆရာများ၏ အလေးပေးဆက်ဆံခြင်းကိုလည်း ခံရသူဟု နားလည်ထားသည်၊ သို့သော် သူကား ပုံမှန်အတိုင်းသာ.. နောက်ဆုံးနှစ်စာမေးပွဲပြီးသောအခါ ကျွန်တော်တို့ချင်း လူချင်းကွဲပြီး ခွဲခဲ့ကြရသည်၊ သူက မဟာတန်းတွင် ဆက်လက်ပညာသင်ကြားခွင့်ရပြီး ကျွန်ုပ်ကတော့ ချင်းပြည်နယ်တောင်တန်းဒေသတွင် တာဝန်ထမ်းဆောင်ရဖို့ ဖြစ်လာသည်၊ သူက တက္ကသိုလ်ပညာများကို ဆက်လက်ဆည်ပူးခွင့်ရခဲ့ပြီး ကျွန်ုပ်ကတော့ ဘ၀တက္ကသိုလ်တွင် ဒုက္ခသုက္ခများကို သင်ယူအုံးပေါ့… သို့သော် မဟာတန်းဆက်တက်ခွင့်ရခဲ့သည့်အတွက် သူ၏ မျက်နှာပေါ်တွင် ထူးထူးခြားခြား ဂုဏ်ယူသည့်အရိပ်အယောင် မတွေ့ရသလို တောင်တန်းသွားရမည့် ကျွန်ုပ်အဖို့လည်း ထူးထူးခြားခြား မခံစားရ.. တကယ်တော့ တက္ကသိုလ်မှာ ကျင့်သုံးနေသည့်စနစ်ကို ကျွန်ုပ် မနှစ်သက်သလို သူလည်း နှစ်သက်လိမ့်မည်ဟု မထင်မိခဲ့…

ကျွန်ုပ်အဖို့ တောင်တန်းတွင် တာဝန်ထမ်းဆောင်ခဲ့ရသော နှစ်နှစ်တာကာလအတွင်း မှတ်မှတ်ရရ ပြောပြစရာ သင်္ခန်းစာတစ်ခုတော့ ရလိုက်သည်၊ ``လူဆိုတာ မခံချင်စိတ်ရှိရုံနဲ့ အရာရာကို လုပ်လို့မရ အကျိုးဆက်တို့ကို ခံနိုင်ရည်ရှိဖို့လဲ လိုသေးသည်``ဟူသော သင်္ခန်းစာ။ အဲဒီသင်္ခန်းစာလေးတစ်ခုရဖို့ ကျွန်ုပ်ရင်းလိုက်ရသည်ကလည်း မနည်းမနော၊ တောင်တန်းတွင် နေရသည့်အတွေ့အကြုံများက ဆန်းကြယ်သည်၊ ကြမ်းတမ်းသည်၊ သို့သော် စိတ်ဝင်စားဖွယ်ကတော့ အတိဖြစ်သည်၊ ကျွန်ုပ်အဖို့တော့ စိတ်ဝင်စားသည့်အခါလည်းရှိသည်၊ တစ်ခါတစ်လေကျတော့လည်း အထာမကျမှုတွေရဲ့အလယ်မှာ ရှင်းမပြနိုင်သော စိတ်ဓာတ်ကျမှုများဖြင့် နှလှန်မထူနိုင်ခဲ့..ဒါပေမယ့် ဒါဟာဘ၀ပါပဲ၊ မိုးခါးရေတစ်ခုပဲ သောက်စရာရှိသည့်အချိန်မှာ မိုးခါးရေမကြိုက်ဟု ပြောနိုင်ခွင့်မရှိကြောင်း စတင်သဘောပေါက်လာခဲ့မိသည်၊ ၂-နှစ် ပြည့်ခါနီးလို့ တောင်တန်းတာဝန်များ ပြီးဆုံးခါနီးတွင် မြန်မာနိုင်ငံတစ်ဝန်း မုန်တိုင်းထန်နေသောနေ့များဟု ဆိုရပါမည်၊ အဲဒီမှာ သမိုင်းသစ်တွေ စတင်ခဲ့သည်၊ ဒါပေမယ့် ကောင်းတဲ့သမိုင်းကား မဟုတ်ခဲ့။ အဲဒီအချိန်က ရွှေဝါရောင်တော်လှန်ရေးဆိုသော သံဃာ့လှုပ်ရှားမှုကြီး ဖြစ်ပွားခဲ့သည်၊ စက်တာဘာအရေးအခင်းဟုလည်း လူသိများခဲ့သည်၊ သံဃာထု၏ အနစ်နာခံမှုများ ပြောင်မြောက်ခဲ့သလို တုန့်ပြန်မှုများကလည်း တစ်ကမ္ဘာလုံး တုန်လှုပ်သွားခဲ့ရသည်အထိ ပီပြင်လွန်းခဲ့သည်၊ ပေးချင်သူနှင့် ယူချင်သူများ အားပြိုင်ခဲ့သည့်ပွဲ..ကျွန်ုပ်အဖို့ ရေဒီယိုကိုသာ မပြတ်နားထောင်နေရသည်၊ သတင်းများက စိတ်ကောင်းနိုင်စရာတစ်ခုမှမရှိ၊ ယုံချင်စရာလည်း ခပ်ခက်ခက်၊ ဒါပေမယ့် ဒီသမိုင်းကတော့ တကယ်ဖြစ်သွားခဲ့သည်၊ အရေးအခင်း ဖြစ်နေသည့်အချိန် မြို့ထဲသို့ သူငယ်ချင်းများနှင့် လမ်းလျှောက်ထွက်ခိုက် အသိရဲတစ်ယောက်က ပြောသည်၊ ကိုယ်တော်တို့ မဆူကြဘူးလားတဲ့၊ တကယ်လို့ မဆူရင် သူတို့ဟားခါးကို လုံခြုံရေးသွားရမယ်တဲ့၊ သူ့စကားက ငိုအားထက် ရယ်အားသန်စေသည့်စကား၊ တကယ်လို့ ဒီမြို့မှာရှိတဲ့ သံဃာတွေ ဆန္ဒပြရင် သူလည်း ဟားခါးကို တကူးတက သွားစရာမလိုတော့ဘူးပေါ့၊ အဲလိုမဖြစ်ခဲ့ရင်တော့ သူတို့ဟားခါးကို သွားကြရမည်၊ သူ့စကားကြောင့် အားလုံးပြုံးမိကြသည်၊ ရဲစခန်းတစ်ခုလုံး သာသနာပြုဘုန်းကြီးများနှင့် မသိသူမရှိ၊ မယကအစ ဘဏ်မန်နေဂျာအဆုံး အားလုံးက တောင်တန်းသာသနာပြုဆရာတော်များနှင့် အကျွမ်းတ၀င်၊ အပြင်တွင် ဆူပူစရာနေရာမရှိ၊ ဒီတော့ မကျေနပ်ချက်တို့သည် စုပေါင်းနေရာအခန်းကျဉ်းလေးတွင်သာ ပဲ့တင်ထပ်ပေါက်ကွဲ..

တက္ကသိုလ်တွင်လည်း ပိုစတာတိုက်ပွဲဆိုပြီး ဖြစ်နေသည်ဟုလည်း သတင်းများတွင် ကြားနေခဲ့ရသည်၊ ပိုစတာတိုက်ပွဲ မြစ်ဖျားခံရာက ဆွမ်းစားကျောင်းကို မကျေနပ်မှုကြောင့် ဖြစ်သည်ဟုလည်း သိခဲ့ရသည်၊ ဒါပေမယ့် ဒီအကြောင်းတစ်ခုတည်းကြောင့်လည်း ဟုတ်ချင်မှဟုတ်မည်၊ တက္ကသိုလ်မှာ အချိုးမကျတာတွေကို တွေးကြည့်ရင် အချိုးကျတယ်ဆိုတာကိုမရှိ…ကျွန်ုပ်အနေဖြင့် စိန်ဘရားသားဆွမ်းစားကျောင်းတွင် လေးနှစ်လေးမိုး ဆွမ်းစားလာခဲ့ရသော အတွေ့အကြုံကြောင့် ထိုအဖြစ်အပျက်အပေါ် အပြည့်အ၀ ကိုယ်ချင်းစာပြီး နားလည်မှုတွင်လည်း ထိုသံဃာများနှင့် တစ်ထပ်တည်းကျခဲ့သည်၊ တက္ကသိုလ်၏ အဆိုးဝါးဆုံးသောနေရာများတွင် စိန်ဘရားသားဆွမ်းစားကျောင်းက နာမည်တစ်လုံးဖြင့်ကျော်နေခဲ့တာ အတော်ပင် ကြာခဲ့ပြီ၊ ယခုမှ ကိုယ်တော်တွေ၏ ခံစားချက်တွေက ပေါက်ကွဲထွက်လာခဲ့ကြသည်ဆိုသည့်သဘော၊ စိန်ဘရားသားတွင် ဆွမ်းစားရသည့်အချိန်များက အကုသိုလ်တစ်ဝက်၊ ငပိရည်တစ်ဝက်ဟု ဆိုနိုင်သည်၊ ဟင်းလိုက်သည့် ၀န်ထမ်းများကို ငပိရည်လောက်ပဲ အလိုက်ခိုင်းလို့ရပေသကိုး… မျက်စိထဲတွင် မြင်ယောင်နေမိပါသေးသည်၊ မနက်အရုဏ်ဆွမ်းတွင် ကပ်သည့်ဆွမ်းက မာတောင့်နေသော ထမင်းကြော်နှင့် လိုက်ဖက်ညီစွာ မာတောင့်နေသော ဘူးသီးကြော်နှင့် ကြက်သွန်ကြော်များ၊ ဒါတောင် လောက်လောက်ငှငှမဟုတ်၊ အနည်းငယ်လောက်နောက်ကျလျှင် ဆွမ်းက မရှိရတာနှင့် ဆွမ်းရှိပြန်တော့လည်း အကြော်က ကုန်သွားရတာနဲ့..တဖန်နေ့ဆွမ်းတွင်ဆိုပြန်တော့ ကြက်သားဆိုလျှင်လည်း တောင်ပံနှင့်လည်ပင်း၊ တစ်ယောက်မျက်နှာ တစ်ယောက်ကြည့်နေရသည်အထိ ကော်ဖို့အားနာနေရသည်အထိ နည်းပါးသည့် ငါးဆုပ်ဟင်း.. စသည်ဖြင့် တက္ကသိုလ်ဆွမ်းစားကျောင်းတွင် ကြုံတွေ့ရသည့်အခြေအနေက ပြောမယုံကြုံမှသိဆိုသည့် အနေအထားမျိုး ဖြစ်သည်၊ ဒါက သံဃာလေးရာ့ငါးဆယ်နှင့် အများပြည်လှူဒါန်းငွေ တစ်နေ့တာဆွမ်းစားရိတ် နှစ်သိန်းရှစ်သောင်းဆိုသည်နှင့် တွက်ချက်ကြုည့်လိုက်ပါက မဖြစ်သင့်သည့် အခြေအနေပဲ မဟုတ်လား၊ အရင်က ထိုအခြေအနေကို မကျေနပ်၍ ဆွမ်းစားနေစဉ် ပုဂံကို အသံမြည်အောင် ခေါက်၍ ဆန္ဒပြမိသောရဟန်းတစ်ပါး နိုင်ငံတော်ပုန်ကန်မှုနှင့် ထောင်ကျသွားဖူးသည်ဟူသတတ်၊

ထို့ကြောင့် တက္ကသိုလ်ပိုစတာတိုက်ပွဲကို စိန်ဘရားသား၏ ကောက်ကြောင်းကို နောကျေခဲ့ကြသူ ကျွန်ုပ်တို့အားလုံး ထိုစဉ်က တက္ကသိုလ်ကျောင်းသားများနှင့် ရင်ဘတ်ချင်း နီးနီးကပ်ကပ်ရှိနေခဲ့ကြတာ ဖြစ်သည်၊ နောက်တော့ တစ်နိုင်ငံလုံးရှိသံဃာများဝါ၀င်သော သံဃာ့အရေးခင်းကြီး ဖြစ်ပေါ်ခဲ့ပြီး ထိုအရေးခင်းကြီး ငြိမ်သက်ခါစအချိန်တွင် တာဝန်ပြီး၍ ကျွန်ုပ်တို့လည်း ရန်ကုန်သို့ ပြန်ခဲ့ကြသည်၊ အောင်မင်္ဂလာအဝေးပြေးသို့ ရောက်သောအခါ ကျွန်ုပ်တို့အား မေးမြန်းစရာရှိသည်ဟုဆိုကာ ကားပေါ်မှ အဆင်းခိုင်းသဖြင့် ဆင်းခဲ့ကြရသည်၊ ရန်ကုန်တွင် အဝေးပြေးဂိတ်များနှိုက် ကားပေါ်တွင် သံဃာတော်များပါသည်ဆိုလျှင် ထိုသို့ပင် အစစ်အဆေးခံကြရသည်ဟု ဆိုသည်၊ စစ်ဆေးရေးဂိတ်သို့ရောက်သောအခါ အရပ်ဝတ်၊ မီသတ်ဝတ်များဖြင့် လူလေးယောက်ခန့်သည် သူတို့သိလိုသည်များကို လေသံမာမာဖြင့် (အပြစ်ရှိ၍ အဖမ်းခံလာခဲ့ရသည့် သူခိုးဓားပြကို မေးမြန်းသည့်ပုံစံများဖြင့်) ရိုင်းရိုင်းစိုင်းစိုင်း စစ်ဆေးမေးမြန်းခြင်းကို ခံခဲ့ကြရသည်၊ သာသနာပြုကဒ်များ၊ သာသာနာပြုရဟန်းတော်ဖြစ်ပြီး တက္ကသိုလ်တွင် ဘွဲ့ယူမည့်ရဟန်းတော်များဖြစ်ကြောင်း ထောက်ခံချက်များကို ပြသော်လည်း သူတို့သည် အပြစ်မရှိ အပြစ်ရှာ၍သာ မောင်းမဲနေကြလေသည်၊ ဘုန်းကြီး မှန်သမျှ ရာဇ၀တ်သားဟု သဘောထားကြသည်လား မသိ၊ ဒီလို လူမျိုးတွေက ဗုဒ်ဓဘာသာဆိုတော့လည်း အင်း ဗုဒ်ဓပေပဲပေါ့၊ ထို့ပြင် ``ကိုယ်တော်တို့ကို အချိန်မရွေး ဖမ်းချုပ်ထားနိုင်တယ်``ဟူ၍လည်း ပြောလိုက်ပါသေးသည်၊ ကျွန်ုပ်သည် တလိပ်လိပ်တက်လာသော ဒေါသများကို ကြိုးစား၍ အနိုင်နိုင်ထိန်းချုပ်ခဲ့ရသည်၊ တာဝန်ရှိသည်ဆို၍ သိချင်သည့်အရာများကို ကောင်းကောင်းမွန်မွန် ဖြေဆိုခဲ့သော်လည်း မဆီမဆိုင် ရိုင်းစိုင်းသည့်အပြုအမူများဖြင့် တုန့်ပြန်ခံနေရသည့်အခြေအနေမှာ အတော်ပင် လက်ခံရခက်သည့်အခြေပင် ဖြစ်လေသည်၊ တက္ကသိုလ်သို့ရောက်သောအခါ အခြေအနေက ပို၍ပင် ဆိုးဝါးလို့နေသည်၊ ကျွန်ုပ်တို့ အဆောင်ရှေ့သို့ရောက်သောအခါ အဆောင်တံခါး ဖွင့်ပေးလို့မရဆို၍ အဆောင်၏နောက်ကြောမှနေ၍ ကျောင်းပေါ်သို့ရောက်အောင် သူခိုးတက်တက်ခဲ့ကြရလေသည်၊

အခြေအနေတို့သည် အလွန်ပင် စိတ်ပျက်စိတ်ရှုပ်စရာကောင်းခဲ့လေသည်၊ ဘွဲ့မယူမီ ၇-ရက်ခန့်အလိုတွင် သတင်းဆိုးတစ်ခုကို ကြားသိခဲ့ရသည်၊ စက်တင်ဘာအရေးခင်းတွင် ပါဝင်သည်ဟူသော အကြောင်းပြချက်ဖြင့် တက္ကသိုလ်မှ ကိုယ်တော်များကို ကျောင်းမှ ထုတ်လိုက်သည်ဟု ဆိုသည်၊ ထိုအထဲတွင် ``သူ`` ပါသွားခဲ့သည်၊ စက်တင်ဘာအရေးခင်းတွင် သူပါလား/မပါလားဆိုသည်ကို အသေအချာ ကျွန်ုပ်မသိ၊ မေးလည်း မမေးမြန်းမိ… သို့သော် ထိုအချိန်က တက္ကသိုလ်တွင် ဘုန်းကြီးများသည် တစ်ယောက်အပေါ်တစ်ယောက် ဘော်လီဘောပုတ်နေသော အချိန်တော့ ဖြစ်ခဲ့သည်၊ စက်တင်ဘာအရေးခင်းကို အကြောင်းပြု၍ အာဏာပိုင်များအကြားတွင် နာမည်ရအောင် လုပ်နေသော ဘုန်းကြီးများ၊ သူများတကာ အစစအရာရာ အနစ်နာခံနေသောအချိန်တွင် မိမိအလုပ်လုပ်သည်ဆိုသည်ကို ပြသဖို့အတွက် ထိုအနစ်နာခံသူများကို ခြေထိုးခံသောဘုန်းကြီးများ၊ တဖန် မိမိနှင့်ဆက်ဆံရေးအဆင်မပြေသော အဆောင်သားများအပေါ်တွင် ရှိသမျှအပြစ်ပုံချ၍ ခေါင်းဆောင်မှုစွမ်းရည်ပြသခဲ့ကြသော အဆောင်မှူးများ၊ တစ်ဆောင်နှင့်တစ်ဆောင် လက်ညိုးထိုးအပြစ်တင်နေကြသောအဆောင်မှူးများ… စသည်စသည်ဖြင့်…… ထိုစဉ်က တက္ကသိုလ်၏ အတွင်းပိုင်း ပုံရိပ်နှင့် ဂုဏ်သိက္ခာတို့သည် မြေကြီးပေါ်တွင် ပိုးလိုးပက်လက်… သို့သော် ထိုကိစ္စကြောင့်(ထိုသို့အနစ်နာခံမှုများကြောင့်) ရရှိလာသော အခွင့်အရေးများကို ယခုသုံးဆောင်ခံစားခွင့်ရ နေကြသည့် ဆရာတော်များမှာလည်း ထိုစဉ်က ဘုန်းကြီးတစ်ယောက်၏ လောဘ၊ ဒေါသ၊ မောဟများနှင့် ယုတ်မာမှုများကို လူများနှင့်မခြား..ပြသခဲ့ကြသည့် ဘုန်းကြီးအစစ်ဆိုသူများ…

နောက်တော့ သူ့ကို ကျွန်တော် သွားတွေ့ခဲ့သည်၊ ကျွန်တော့်လိုပဲ သူ့ကို လာတွေ့သည့်သူတွေ အတော်များပြားတာကိုလည်း တွေ့ခဲ့ရသည်၊ သို့သော် သူသည်ကား အရင်လို တည်တည်ငြိမ်ငြိမ်နှင့်ပဲ ရှိနေသည်၊ သူ့ကို အခုလိုမျိုး တကူးတက လာတွေ့တာကို အသိအမှတ်ပြုသည့်ဟန်ရှိသော်လည်း သူ့ကို သနားစရာသတ္တ၀ါတစ်ယောက်အနေအားဖြင့် အားပေးနှစ်သိမ့်မှုများကိုကား လိုလားနှစ်သက်သည့်ဟန်မရှိ၊ ထို့ပြင် သူ့တွင် တက္ကသိုလ်မှ အထုတ်ခံရသည့်အတွက် စိတ်ထိခိုက်နေသည့်ပုံစံမျိုးလည်း မတွေ့ရ.. သူသည် သူ၏ second plan-ကိုသာလျှင် တည်ငြိမ်စွာ အကောင်အထည်ဖော်လျှက် ရှိနေသည်၊ နောက်တော့ သူက ပြောသည်၊ တက္ကသိုလ်က အထုတ်ခံရလို့ ၀မ်းနည်းစရာမရှိပါဘူးတဲ့… ဂုဏ်တောင်ယူပါသေးတယ်တဲ့.. ဒီစကားကို သူတမင်လုပ်ပြီး ပြောခဲ့တာမဟုတ်မှန်း သူ့ကိုကြည့်၍ ကျွန်ုပ်သိနိုင်သည်၊ နောက်တော့ သူ နိုင်ငံခြားထွက်သွားခဲ့သည်၊ သူ နိုင်ငံရပ်ခြားရောက်နေသည့် အချိန်တွင် အဆက်အသွယ်ဆိုသည်က ကျိုးတို့ကြဲတဲဖြစ်နေသော်လည်း သူ့အကြောင်းတွေကိုတော့ ကြားသိနေရသည်၊ ထုံးစံအတိုင်း သူတော်ကြောင်းတွေပါပဲ..၊ ဒါက အံ့သြစရာမရှိပါဘူး..သူက တော်နေတာပဲလေ.. သူညံ့သွားတယ်ဆိုရင်သာ ကျွန်ုပ်အတွက် အံ့သြစရာဖြစ်လာရမှာပါ.. နိုင်ငံခြားတွင် ရှိနေစဉ်အတွင်း သူသည် ဘလော့ဂ်တစ်ခု လုပ်ခဲ့ပြီး ဘလော့ဂ်ဂါတစ်ယောက်လည်း ဖြစ်လာခဲ့သည်၊ သူ၏ ဘလော့ဂ်သည် သူ၏ စိတ်ကူးစိတ်သန်းများကို ပြသရာနေရာ၊ ခံယူချက်များကို ထုတ်ဖော်ရာနေရာတစ်ခုလည်း ဖြစ်လာခဲ့ပြီး အမှန်တရားကို လက်ခံသောလူနည်းစုကြားတွင် သူ၏ ဘလောဂ့်သည်လည်း နေရာရလာခဲ့သည်၊

ယခု သူပြန်ရောက်၍ သူနှင့်ပြန်တွေ့ရသောအချိန်တွင် ပုံစံက အရင်လိုပင် ဖြစ်သော်လည်း လူကတော့ နည်းနည်းဝလာသည်၊ နှုတ်ခမ်းမွေးကလည်း ကြဲတဲတဲ၊ နည်းနည်းတော့ အကြည့်ရဆိုးနေသည်၊ အလုပ်တွေ ရှုပ်လို့ ထင်သည်၊ သူနှင့်စကား ထိုင်ပြောဖြစ်တော့ ဓနုဖြူတွင် ကမ်းပြို၍ လူတွေဒုက္ခရောက်တာကို ကြည့်ပြီး ပြန်လာတာ မကြာသေးဟု ပြောသည်၊ ထိုနေ့က ကျွန်ုပ်ရယ်၊ သူရယ်၊ အခြားသူငယ်ချင်းတစ်ယောက်ရယ် ကျသင့်သည့်ငွေသွင်းပါလျှက်နှင့် မကြာခဏ ဖုန်းလိုင်းဖြတ်ခံနေသည်ကို ဖြေရှင်းရန် ဖုန်းရုံးသို့ သွားခဲ့ကြသည်၊ ရုံးသို့ရောက်သောအခါ မြင်ကွင်းက အလွန်ပင် အံ့အားသင့်စရာကောင်းနေသည်၊ ဖုန်းဆက်၍ ကျသင့်ငွေကို လာပေးရသည်ကိုပင် အလွန်ခက်ခက်ခဲခဲ အချိန်အကြာကြီး တန်းစီ၍ ပေးနေကြရသည်၊ အလကားဝေသည့် ထမင်းထုပ်ကို ယူရန်အတွက် တန်းစီနေကြရသည့်ပုံစံမျိုး… မျက်နှာများမှာလည်း စိတ်မရှည်သည့်မျက်နှာ ညိုးငယ်သည့်မျက်နှာများဖြင့်သာ… ကျွန်ုပ်အဖို့ ဤကဲ့သို့သော မြင်ကွင်းမျိုးကို ယခုမှ ပထမဆုံးအကြိမ် မြင်ဖူးခြင်း ဖြစ်သည်၊ ဖုန်းရုံးကိုလည်း အခုမှတစ်ခါရောက်ဖူးသည်ကိုး..အခုမှပင် ကျွန်ုပ်၏ လက်ထဲတွင်ရှိသော ဖုန်း၏ တန်ဘိုးကို ကောင်းကောင်းနားလည်သွားရသည်၊ သူ့ကို ကြည့်လိုက်တော့ စိတ်တိုနေသည့်ပုံမျိုး တွေ့ရသည်၊ ထို့ကြောင့် ကျွန်ုပ်က ``စိတ်မတိုပါနဲ့ကွာ၊ ဒီနိုင်ငံမှာ နေသွားပြီးပြီဆိုရင် ဘယ်နိုင်ငံမှာမဆို နေလို့ရသွားပြီ``ဟု ပြောလိုက်မိသေးသည်၊ အခုတလော နေရာတကာတွင် ပြည်သူ့အကျိုး..ပြည်သူ့အကျိုးဆိုသော စကားကို မကြားချင်မှအဆုံးဖြစ်နေသော်လည်း ထိုတွင် ငါတို့အကျိုးကား မပါသေး.. အေးလေ..သူတို့ကိုယ်တိုင်ကလဲ ပြင်စရာအများကြီး ကျန်သေးတယ်ဟု ၀န်ခံထားပေသကိုး.. ခက်တာက နောက်ဆက်တွဲအတွေး ပါပဲ..အဲဒီဟာတွေကို ဒီလောက်ပြင်ဆင်နေရအောင် ဘယ်သူတွေက ဖျက်ခဲ့တာတဲ့လဲ….ပြန်ခဲ့ရာ လမ်းတစ်လျှောက်တွင် အတွေးတွေ တစ်သီကြီးပါလာခဲ့သည်၊

ဒါတွေက သူ့ရဲ့ရန်ကုန်သွားတောလားကို ဖတ်ပြီး အတိတ်ကို စားမြုံ့ပြန်မိသည့်အကြောင်း အရာများရယ်ပါ၊ ဒီနိုင်ငံမှာ ဒီလိုတောလားမျိုးတွေ များများပေါ်ပေါက်ဖို့ လိုနေသေးသည်၊ သူ့တောလားတွင် ရေးသားထားသည့်အကြောင်းအရာတွေက လူတိုင်းမြင်နေရပြီး လူတိုင်းသတိမထားမိသည့် အခြေအနေများ ဖြစ်သည်၊ နောက်ပြီးတော့ စဉ်းစားစရာတွေကိုလည်း အများကြီးပေးသည်၊ သူ ခရီးများများသွားလျှင် ကောင်းမည်ဟု စိတ်ထဲတွင် ဖြစ်မိသည်နှင့်အမျှ နောက်ထပ် တောလားများစွာကိုလည်း ဖန်တီးနိုင်ပါစေဟု ရင်ထဲတွင် ဆန္ဒပြုနေမိပါသည်။

ထနောင်းပန်း (၅-၁၂-၂၀၁၂)