ဘူဂျန်ဗယ်လီသို့ တစ်ခေါက်


မလေးရှားနိုင်ငံမှာ ဟိုးရှေးရှေးတုန်းက ဗုဒ္ဓဘာသာ ထွန်းကားခဲ့တယ်လို့ လူအများ ပြောလေ့ရှိကြတယ်။ ပြောသာပြောနေကြရတာ ဘယ်ကဘယ်လို အထောက်အထားတွေ ရှိတယ်မှန်း မသိခဲ့ဘူး။ ဘယ်မှာ စေတီပုထိုးကြီး ရှိခဲ့တယ်၊ ဘယ်မှာ ဗုဒ္ဓကျောင်းဆောင်တွေရှိခဲ့တယ်လို့ ဆိုနိုင်တဲ့ ထင်ရှားတဲ့ အဆောက်အအုံတွေလည်း မတွေ့ဖူးဘူး။ ၇၊ ၀၂၊ ၂၀၁၁-ခုနှစ်မှာ ထိုင်းနိုင်ငံ၊ လန်းပန်းမြို့၊ ၀ပ်ထာမအိုးကျောင်းဆရာတော်ကြီးနဲ့အတူ ထူးဆန်းတဲ့နေရာတစ်ခုကို သွားခွင့်ကြုံခဲ့ပါတယ်။ ဆရာတော်ကြီးဟာ သက်တော် ၉၂-နှစ်ရှိပြီ ဖြစ်ပေမယ့် လမ်းလျှောက်နေနိုင်ပါသေးတယ်။ ထူးဆန်းတဲ့နေရာဆိုတာကတော့ ပီနန်းမြို့ကနေ ၁-နာရီခန့် ကားစီးသွားရတဲ့ ဘူဂျန်ဗယ်လီ (Bujung Valley) ဆိုတဲ့အရပ်ပါပဲ။

တောတောင်တွေ ထူထပ်တဲ့အရပ်ဒေသလေး ဖြစ်ပါတယ်။ ပြတိုက်ထဲမှာ လျှောက်လည်ကြည့်တော့ လွန်ခဲ့တဲ့ နှစ်ပေါင်း ၁၈၀၀ ခန့်က အပျက်အစီးတွေကို တွေ့ခဲ့ရတယ်။ စာရေးထားတာကတော့ များသောအားဖြင့် ဟိန္ဒူကျောင်း၊ ဟိန္ဒူအထိမ်းအမှတ်…စသည်တွေပဲ များပါတယ်။ လက်တွေ့အဆောက်အအုံဟောင်းတွေကို လိုက်ကြည့်တော့ ဟိန္ဒူကျောင်းထက် ဗုဒ္ဓဘာသာကျောင်း၊ ဗုဒ္ဓဘာသာအဆောက်အုံတွေ၊ စေတီတွေများ ဖြစ်နေမလားလို့ သံသယဖြစ်မိပါတယ်။ ကိုယ်ကလည်း သမိုင်းပညာရှင်မဟုတ်လေတော့ ထူးထူးခြားခြား အကဲမဖြတ်တတ်ပါဘူး။ စိတ်ထဲမှာ ထင်နေတာပဲ ရှိပါတယ်။ စာဖတ်သူတွေလည်း ဓာတ်ပုံတွေ ကြည့်ကြည့်ပေါ့။

အဲဒီ အပျက်အစီးတွေ မှတ်တမ်းမှာ အားလုံးနီးပါးကို ဟိန္ဒူသင်္ကေတတွေလို့ မှတ်တမ်းတင်ထား၊ ကောက်ချက်ချထားတာ များပေမယ့် တစ်ခုကတော့ ဗုဒ္ဓဘာသာ အဆောက်အအုံလို့ ကမ္ဗည်းတင်ထားပါတယ်။ နှစ်ကာလကိုတော့ အေဒီ ၅-ရာစုလို့ သက်မှတ်ပေးထားပါတယ်။ အချို့အပျက်အစီးတွေမှာလည်း နှစ်ကာလသတ်မှတ်တဲ့နေရာမှာ အေဒီ ၄-ရာစုကနေ ၁၂-ရာစုလို့ သတ်မှတ်တာ များပါတယ်။ ဒီတော့ အေဒီ ၅-ရာစုခန့်မှာ ဗုဒ္ဓဘာသာနဲ့ ဟိန္ဒူဘာသာဟာ ခေတ်ပြိုင်ထွန်းကားခဲ့တယ်လို့ ဆိုရမယ်ထင်ပါတယ်။

နောက်များ အချိန်ရရင် မလေးရှားနိုင်ငံ ဗုဒ္ဓဘာသာသမိုင်းလေး ရေးချင်စိတ် ဖြစ်မိပါတယ်။



















Comments