Thursday, December 4, 2014

တန်ဖိုးရှိနေဖို့ အရေးကြီးပါတယ်


(၁)

စတိတ်ခုံပေါ်မှ အော်သံကြောင့် လူတွေ လှုပ်လှုပ်ရွရွ ဖြစ်သွားတယ်။ "ဟောဒိ ဒေါ်လာ ၅ဝ တန်ကို ဘယ်သူ ယူချင်ပါသလဲခင်ဗျာ၊ ယူချင်တဲ့သူ လက်ညှိုးထောင်ပါ"လို့ အော်နေတာပါ။ ဒါနဲ့ ပရိသတ်တွေအားလုံး လက်ညှိုးတွေ ထောင်ကြတယ်။

"ဒီဒေါ်လာ ၅ဝ တန်ကို ခင်ဗျားတို့ကို ပေးမှာပါ။ ဒါပေမဲ့ မပေးခင် ကျွန်တော် လုပ်ချင်တာလေး လုပ်ပါရစေဦး"လို့ ပရိသတ်ကို ခွင့်တောင်းပြီး ဒေါ်လာကို လုံးခြေပစ်လိုက်တယ်။ ပရိသတ်ကို လုံးခြေထားတဲ့ ဒေါ်လာကို ပြရင်း "လိုချင်ပါသေးလားခင်ဗျာ"လို့မေးတော့ အားလုံးက လက်ညှိုးထောင်ကြတယ်။

ဒါနဲ့ သူက အောက်ကို ချနင်းပစ်ပြီး ဖနောင့်နဲ့ပေါက်ပစ်လိုက်ပြန်တယ်။ ပြီးမှ "လိုချင်ပါသေးလားခင်ဗျာ"လို့ မေးပြန်တယ်။ ပရိသတ်တွေအားလုံးက လက်ညှိုးထောင်လျက်ပါပဲ။
ဒီတော့မှ သူက ဆက်ပြောတယ်။ "ကဲ ခင်ဗျားတို့ သင်္ခန်းစာရသွားပြီ မဟုတ်လား။ ဒီဒေါ်လာကို ကျုပ် ဘယ်လိုလုပ်လုပ် ခင်ဗျားတို့ လိုချင်နေတုန်းပဲ။ အဲဒါ ဘာဖြစ်လို့လည်းဆိုတော့ တန်ဖိုးကျမသွားလို့ပဲ"လို့ ဆိုလိုက်တော့ ပရိသတ်လက်ခုပ်သံတွေ ဆူညံသွားခဲ့တယ်။

(၂)

တစ်ခါက ဖတ်ခဲ့ဖူးတဲ့ စာအုပ်ထဲကပါ။ ဒေါက်တာသိန်းလွင် ဘာသာပြန်တယ်လို့ ထင်ပါတယ်။
မိမိတို့ကိုယ်တိုင်ရော ပတ်ဝန်းကျင်မှာပါ ထိခိုက်နာကျင်စရာတွေ၊ မုန်းတီးစက်ဆုပ်ဖွယ်ရာတွေ၊
အဖိအနှိပ်အချုပ်အခြယ်၊ အနိုင်ကျင့်ခံရတာတွေ၊
အာဏာကြောင့်၊ ငွေကြောင့်၊ (ရဟန်းတွေမှာဆို အသက်သိက္ခာကြောင့်) ချေမှုန်းခံရတာတွေ၊
တွန်းထိုးခံရတာတွေ၊
တစ်ဖက်သတ်ချောက်ချခံရတာ ခြုံခိုတိုက်ခိုက်ခံရတာတွေ၊
ကိုယ့်စည်းစိမ် ကိုယ့်စီးပွားရေးကို နစ်နာအောင် ဆောင်ရွက်ကြတာတွေ၊ ကိုယ့်သိက္ခာကျအောင် ပြောဆိုနှိပ်ကွပ်ကြတာတွေ ....
မြောက်မြားစွာ ကြုံတွေ့ဖူးကြပါလိမ့်မယ်။ သင်လည်း တစ်နည်းမဟုတ် တစ်နည်းတော့ ကြုံတွေ့ဖူးမှာပါ။

(၃)

ဒ်ါလာကို ဘယ်လောက်ပဲ လုံးခြေပစ်၊ နင်းခြေပစ်ပေမဲ့ သူ့မှာ တန်ဖိုးက ရှိနေတော့ လူတွေက လိုချင်နေကြဆဲပါပဲ။
လုံးချေထားတဲ့ ဒေါ်လာအနွမ်းအကြေလေးကို လူအုပ်ထဲ ပစ်ချကြည့်ပါလား။ အားလုံး လုကောက်ကြလိမ့်မယ်။ ရတဲ့သူက ပျော်ရွှင်စွာ ဆုပ်ကိုင်ရင်း အနမ်းလေးတောင် ပေးကောင်း ပေးပါလိမ့်မယ်။

(၄)

ဘဝမှာ အခက်အခဲတွေ ဘယ်လောက်ကြုံကြုံ၊ အဖိအနှိပ်အထုအထောင်းတွေ ဘယ်လောက်ခံရခံရ ဒေါ်လာလို တန်ဖိုးရှိနေဖို့ လိုပါတယ်။ တန်ဖိုးရှိအောင် ကြိုးစားဖို့ လိုပါတယ်။ တန်ဖိုးရှိမှသာ ရောက်လေရာအရပ်မှာ အသုံးတည့်မှာပါ။ အသုံးတည့်မှသာ လောကကြီးက အနမ်းတွေ ပေးတာပါ။

"ငါဟာ ဒေါ်လာလို တန်ဖိုးရှိသူဖြစ်တယ်၊ ငါဟာ ဒေါ်လာလို အသုံးဝင်သူဖြစ်တယ်"လို့ တစ်နေ့တစ်ခါလောက် ရွတ်ဆိုပြီး တန်ဖိုးရှိသထက်ရှိအောင် ကြိုးစားသင့်ပါတယ်လို့ဆိုရင် သဘောတူမလား။

မိသားစုထဲမှာပဲဖြစ်ဖြစ်၊ မိတ်ဆွေအပေါင်းအသင်းတွေထဲမှာဖြစ်ဖြစ်၊ မိမိရောက်ရာ တည်ရှိရာ နေရာတိုင်းမှာ မိမိကိုယ်ကို တန်ဖိုးရှိအောင် ကျင့်သုံးနေထိုင်ဖို့ လိုအပ်လှပါတယ်။ သင် ရှာဖွေကြိုးစားတည်ဆောက်ထားတဲ့ တန်ဖိုးတွေက သင့်ဘဝ ပိုမိုမြင့်မားအောင် မြှင့်တင်ပေးမှာပါ။

အရှင်ကုသလသာမိ(အတည်မဲ့)
ဝ၇၊ ၁၁၊ ၂ဝ၁၄

No comments:

နမော တဿ ဘဂ၀တော အရဟတော သမ္မာသမ္ဗုဒ္ဓဿ

LinkWithin

Related Posts with Thumbnails