Sunday, January 31, 2010

သုံးချက်သိမှာ တတိယာ (၄)


အထက်တွင် ဖော်ပြထားသော ရုပ်ပုံနံပါတ် ၂၉၊ ၃၀၊ ၃၁-ပုံတို့သည် ရုပ်ပုံနံပါတ် ၂၇၊ ၂၈-ပုံတို့တွင် ထွက်လေနှင့်မှုတ်ထား၊ ချဲ့ကားထားသော တစ်ဘက်နားအပြင်ဘက်ရှိ အလင်းနိမိတ်တုံးကြီးကို ရှုလေ၊ ရှိူက်လေတို့နှင့်ဆွဲယူလိုက်ပြီး ကျန်နားတစ်ဘက်တွင် တည်လာပုံကို ပြဆိုထားခြင်း ဖြစ်ပါသည်။ တစ်ဖန် ထုတ်သောလေနှင့် တစ်ဘက်နား၊ ရှိူက်သောလေနှင့်တစ်ဘက်နားအားဖြင့် ထုတ်ချည်မှုတ်ချည် အပြန်အပြန်အလှန်လှန် တရစပ်ကြိုးစားအားထုတ်ရမည်။ အလင်းနိမိတ်တုံးကြီးသည် လှေများလွန်းထိုးပြေးသွားနေသကဲ့သို့ ပြေးချည်ပြန်ချည် အရောက်တလက်လက်၊ တဖျပ်ဖျပ် တရိပ်ရိပ်၊ ဟိုဘက်ဒီဘက် ကူးသန်းနေပါလိမ့်မည်။

ဥပမာအားဖြင့် ပုခုံးအထက်တွင် ကန့်လန့်ဖြတ် မီးရဲနေသောသံတုံးကြီးနှင့် ဆောင့်နေ တိုက်နေသကဲ့သို့ ဖြစ်နေပေလိမ့်မည်။ တစ်နည်းအားဖြင့် အရောင်လင်းသော တိမ်တိုက်ကြီး တိမ်လုံးကြီး အုပ်ဖုံး၍ အုပ်ဖုံး၍သွားသော လ၀န်းနေ၀န်းကြီးများပမာ မိမိ၏ဦးခေါင်းပေါ်သို့ အလင်းတုံးကြီး အုပ်ဖုံးပြီး ပျောက်၍ပျောက်၍ နေရှာပေလိမ့်မည်။ မီးစကို ကန့်လန့်အနေအထားဖြင့် မြန်မြန်ရမ်းလျှင် မီးတန်းကြီးတစ်ဆက်တည်း မြင်ရထင်ရသကဲ့သို့ နိမိတ်ကြီး ဆက်လာပေလိမ့်မည်။

အကယ်၍ နိမိတ်တုံးကြီး လိုသလောက် အလင်းကို မရလျှင် နေပူပူတွင် မှန်ထောင်ပြီး ကြည့်ပါ။ မကြည့်ရဲလောက်အောင်သောအလင်းကို တွေ့ရပေလိမ့်မည်။ နောက် မျက်စိကိုမှတ်၍ အဆိုပါ အလင်းမျိုး ငါ၏နိမိတ်လင်းစေရမည်ဟု စိတ်ကမှန်း၍ အားထုတ်ပေးရမည်။ အချို့ယောဂီများသည် အားထုတ်ရင်းအားထုတ်ရင်း မှိတ်ထားသောမျက်စိမှ မျက်ရည်များ စီးကျလာတတ်သည်။ အဘယ်ကြောင့်ဟု မေးသောအခါ မိမိအားထုတ်လိုက်သောနိမိတ်က မျက်စိစူးလို့ပါဟု ဖြေတတ်ကြသည်။ အဆိုပါနိမိတ်မျိုးကား အတိုင်းထက်အလွန် လင်းလှပေသည်။
အထက်ပါနည်းအတိုင်း အားထုတ်သောအခါ ရုပ်ပုံနံပါတ် ၂၉၊ ၃၀၊ ၃၁-ပုံများအတိုင်း အလင်းနိမိတ်တန်းကြီး တစ်ဆက်တည်းကဲ့သို့ ဖြစ်လာပေလိမ့်မည်။ အစပထမတွင် ဦးခေါင်းအလယ်၌ ရေးရေးသာမြင်ရသော်လည်း နောက်ပိုင်းတွင် ရုပ်ပုံနံပါတ် ၃၂-အတိုင်း ဦးခေါင်းပြတ်လျှက် ပခုံးနှစ်ဘက်ပေါ်တွင် ဖန်ကြည်မှန်ကြည်တုံးကြီး တင်ထားသကဲ့သို့ ထင်မြင်လာပေလိမ့်မည်။

နောက်တစ်ဖန် အလင်းတုံးကြီးကို ခါးက အထက်ပိုင်း တဲ့တဲ့ချိန်လျှက် တစ်ဖန်ထုတ်လေ၊ ရှူလေတို့နှင့် ဆွဲပြန်တွန်းပြန်သဖြင့် အထက်တွင် ပြထားသည့်အတိုင်း နိမိတ်ဆက်မိသောအခါ တင်ပလ္လင်ခွေအပြတ်ကြီးသာ ကန်တော့လျှက် ထိုတင်ပလ္လင်ခွေ၏အထက်တွင် ဖန်တုံးကြီးတင်ထားသကဲ့သို့ ရုပ်ပုံနံပါတ် ၃၃-အတိုင်း မြင်လာပေလိမ့်မည်။

ထို့နောက် ကျန်အပြတ်ကြီးကို ဆက်လက်တိုက်ဖျက်ပါက နံပါတ် ၃၄-တွင်ပြထားသည့်အတိုင်း တစ်ကိုယ်လုံးပျောက်လျှက် အလင်းတုံးကြီးသာ ကျန်နေပေတော့မည်။ ဤကား ၀ိပဿနာသို့ ဆက်လက်ရှုမှတ်ပွားများလိုသော ယောဂီများအတွက် အလွန်အကျိုးများသော နိမိတ်စားနည်းတို့ ဖြစ်ပါသည်။ ဤနည်းကို အဇ္ဈတ္တံ ၀ါ ဗဟိဒ္ဓါ ၀ါ ကာယေ ကာယာနုပဿီ ဟူသောပါဠိတော်အရ ဗဟိဒ္ဓသုံးချက်ရှုနည်းပင် ဖြစ်ပါသည်။ အဇ္ဈတ္တသုံးချက်ရှုနည်းမှာ နောက်တွင် ထင်ရှားပါလိမ့်မည်။

No comments:

နမော တဿ ဘဂ၀တော အရဟတော သမ္မာသမ္ဗုဒ္ဓဿ

LinkWithin

Related Posts with Thumbnails